Արարատի մարզում թալանել են ՌԴ 56-ամյա քաղաքացու բնակարանը. հափշտակել են 1 մլն 800 հազար ռուբլի

Հասարակություն 29 Նոյեմբեր, 2019 23:27

Երեկ՝ նոյեմբերի 28-ին, առաձնապես խոշոր չափի գողության դեպք է տեղի ունեցել Արարատի մարզում։

Ինչպես հայտնում է Shamshyan.com-ը, ոստիկանության Երևան քաղաքի վարչության օպերատիվ կառավարկան կենտրոն ահազանգ է ստացվել Նոր Խարբերդ 15-րդ փողոցի տներից մեկի բնակիչ՝ 49-ամյա Հռիփսիմե Հ-ից, ով հայտնել է, որ գալով տուն՝ նկատել է պատուհանը կոտրած։ Այնուհետև մտնելով տուն՝ տեսել է, որ տանից գողություն է կատարվել։

Դեպքի վայր են ժամանել ոստիկանության Մասիսի բաժնի օպերատիվ խումբը՝ բաժնի պետ Գևորգ Պողոսյանի գլխավորությամբ։ Ժամանել է նաև ոստիկանության Արարատի մարզային վարչության պետի ժամանակավոր պաշտոնակատար Արթուր Զաքարյանը։

Տեղում աշխատել են նաև Հայաստանի քննչական կոմիտեի Արարատի մարզային քննչական վարչության խումբը՝ քննիչ Բաբայանի գլխավորությամբ։

Ոստիկաններն ու քննիչները պարզել են, որ երեկ, ժամը 16։20-ից մինչև 23։50-ն ընկած ժամանակահատվածում անհայտ անձը կամ անձինք տեխնիկական միջոցների գործադրմամբ Հռիփսիմե Հ-ի տան խոհանոցի պատուհանի երկաթե ճաղավանդակը կոտրել են և մուտք գործել տուն և այնտեղից գողացել 1 մլն 800 հազար ՌԴ ռուբլի, ոսկյա զարդեր և Lenovo տեսակի պլանշետ։

Փաստի առթիվ Հայաստանի քննչական կոմիտեի Արարատի մարզային քննչական վարչության Մասիսի քննչական բաժնում նյութեր են նախապատրաստվում։

Կայքի տեղեկություններով՝ գումարը պատկանել է Հռիփսիմե Հ-ի ամուսնուն, ով նաև ՌԴ քաղաքացի է։