Հայաստանյան գործընթացները դաշտ են բացել քաղաքական շահարկումների համար. Աշոտ Ղուլյան

2018 թվականին մայր Հայաստանում տեղի ունեցած զարգացումները չէին կարող իրենց արտացոլումը չունենալ Արցախում ներքաղաքական իրավիճակի վրա: «Արցախպրես»-ի թղթակցի հաղորդմամբ՝ այս մասին այսօր կայացած Արցախի ժողովրդավարական կուսակցության համագումարին ասել է կուսակցության նախագահ Աշոտ Ղուլյանը:

 

Նրա խոսքով՝ հայաստանյան իրադարձություններին հասարակության արձագանքը զուսպ էր ու հավասարակշռված՝ իրական փոփոխությունների հստակ ակնկալիքով, միևնույն ժամանակ երկրի անվտանգության և կայունության անձեռնմխելիության գիտակցումով:

 

«Հասարակության նման վերաբերմունքը ամբողջապես համապատասխանում է մեր քաղաքական ուժի կողմից որդեգրված քաղաքականությանը՝ զարգացնել գործընկերային հարաբերություններ հայաստանյան իշխանությունների հետ, պայքարել համահայկական միասնության խարխլման ցանկացած գործողության դեմ և որպես արցախյան քաղաքական ուժ առաջնորդվել զուտ արցախյան քաղաքական օրակարգով: Անշուշտ, Հայաստան-Արցախ քաղաքական խորը ինտեգրացիայի պայմաններում հայաստանյան գործընթացները լայն հնարավորություններ են ստեղծել նաև Արցախում ժողովրդավարական զարգացմանը նոր խթան հաղորդելու տեսանկյունից՝ ցավալիորեն նաև դաշտ բացելով քաղաքական շահարկումների համար»,- նշել է ԱԺԿ նախագահը:

 

Ա. Ղուլյանը կարծում է, որ այս իրավիճակում, որպես հիմնականում մտավորականության շերտը ներկայացնող քաղաքական միավորում, ԱԺԿ-ն պարտավոր է իր վրա վերցնել հանրությանը տարաբնույթ մանիպուլյացիաներից պաշտպանելու կարևոր առաքելությունը՝ անընդհատ բարձրաձայնելով դրանց մասին, բացատրելով դրանց հնարավոր հետևանքները:

 

«Արցախի ապագան կառուցում է արցախցին՝ իր քվեով, իր որոշմամբ, իր վստահությամբ, իր համոզմունքներով: Սա է ժողովրդավարության և ազատ կամարտահայտության մեր ընկալումը»,- ընդգծել է Ա. Ղուլյանը: