Հիմա մարդիկ կարող են ավելի սթափ նայել քաղաքական զարգացումներին. կարծիք

Երկրում տիրող ներքաղաքական ու հասարակական փոփոխություների՝ մասնավորապես Սերժ Սարգսյանի ԵԺԿ համագումարում ելույթի, Հանրային խորհրդի նախկին նախագահ Վազգեն Մանուկյանի կողմից «Վերնատուն» անունը կրող հասարակական նախաձեռնության, ինչպես նաև ԱԱԾ նախկին տնօրեն Արթուն Վանեցյանի կողմից կուսակցության հիմնելու թեմաների շուրջ ԼՈՒՐԵՐ.com-ի թղթակիցը զրուցեց քաղաքագետ Աղասի Ենոքյանի հետ: 

«Այս ամենը վկայություն է նրա, որ այս  բոլոր ուժերը  կարծես շոկից դուրս են եկել և կարողանում են վերակազմավորվել, մասնավորապես, սա վերաբերում է Հանրապետական կուսակցությանը: Մյուս կողմից՝ Նիկոլ Փաշինյանի սխալներն այնքան ակնհայտ են դարձել, որ այս ուժերը կարծում են, որ  իրենք արդեն հնարավորոություն ունեն հանրային քաղաքականության մեջ տեղ ունենալու: Ենթադրում եմ՝ նրանք ասելիք ունեն: Ներկա իրավիճակում ամեն ինչ այնքան էլ միանշանակ չէ, այսինքն՝ այլևս չկա այդ, այսպես ասած,  բոլորի հիպնոսը: Հիմա մարդիկ կարող են ավելի սթափ նայել քաղաքական զարգացումներին»,- նշեց Ենոքյանը:

Նա դժվարացավ պատասխանել մեր այն հարցին, թե, այնուամենայնիվ, ովքեր կմիանան Վանեցյանին՝ մասնավորապես նշելով. «Իրականում դժվարանում եմ պատասխանել այդ հարցին, բայց կարծում եմ, որ ինքը մտածում է իր ընկերական շրջապատի  ու նախկին սպաների մասին, ովքեր  ծառայել են այս կամ այն ուժային կառույցներում: Բայց և մյուս կողմից, եթե շրջանառվող լուրերի համաձայն կուսակցությունը կոչվելու է «Պատիվ ունեմ», ապա կարծում եմ, որ հենց այդպես էլ կլինի»:

Մեր այն դիտարկման, թե այս քաղաքական-հասարակական ուժերը, ո՞ր դեպքում հաջողության կհասնեն, քաղաքագետը պատասխանեց, որ դա տեղի կունենա այն դեպքում, եթե Փաշինյանը շարունակի նույն սխալները գործել. «Որպես օրինակ կարող եմ ասել վերջին օրերին շատ շրջանառվող, այսպես ասած, կամազների հետ կապված հարցը: Եթե շարունակվեն նման խայտառակ սկանդալներ, ապա, բնականաբար, սա շանս է բոլոր տեսակի ընդդիմադիրների համար»:

Ենոքյանը անդրադարձավ նաև հասարակության հիասթափության հարցին՝ մասնավորապես ասելով. «Հիասթափության  հետ կապված մի շատ կարևոր խնդիր կա. մարդիկ մտածում են, որ եթե Նիկոլ Փաշինյանից հիասթափվեն, ո՞վ կարող է լինել նոր ընդդիմության լիդերը: Հիմա տեսնում ենք, որ մի քանի լիդերներ են առաջ քաշվում, ինչը շատ կարևոր գործոն է»: