Դադարեք իբրև սեփական աշխատանքի արդյունք ներկայացնել ԱՆ նախկին ղեկավար կազմի մշակված ռազմավարությունները․ Խաչիկյան

Դադարեք իբրև սեփական աշխատանքի արդյունք ներկայացնել ոլորտային այն ռազմավարությունները, որոնք գրեթե ամբողջությամբ մշակվել են արդարադատության նախարարության նախկին ղեկավար կազմի ժամանակ։ Այս մասին ֆեյսբուքյան իր էջում գրել է արդարադատության նախկին փոխնախարար Տիգրան Խաչիկյանը։

«Դեռևս նախընթաց տարվա ընթացքում Կառավարության կողմից ընդունված հակակոռուպցիոն ռազմավարությամբ, ի թիվս բազմաթիվ այլ միջառումների, նախատեսել էինք նաև այնպիսիք, որոնք պետք է իրականացվեին հենց 2019թ.-ի ընթացքում: Դրանց վերաբերյալ մինչ այս պահն առկա չէ պաշտոնապես հրապարակված որևէ փաստաթուղթ: Մասնավորապես,

1. Հակակոռուպցիոն կոմիտեի ձևավորման նպատակով մշակել նախագծերի փաթեթ և ներկայացնել ՀՀ Վարչապետի աշխատակազմ.

2. Հակակոռուպցիոն մասնագիտացված դատարանների վերաբերյալ միջազգային լավագույն փորձի հիման վրա մշակել և ՀՀ Վարչապետի աշխատակազմ ներկայացնել նախագծերի փաթեթ.

3. Պետական պաշտոններում նշանակման ենթակա անձանց, դատավորների և դատավորների թեկնածուների, դատախազների և դատախազների թեկնածուների, քննիչների բարեվարքության կանոնների պահպանման նկատմամբ հսկողության իրականացման կառուցակարգերի վերաբերյալ միջազգային լավագույն փորձի հիման վրա մշակել և Ազգային ժողով ներկայացնել նախագծերի փաթեթ. (այս մեկն անձամբ Վարչապետի կողմից թիրախավորված առաջնայնություն էր)

4. 03.03.2018թ. ընդունված «Հանրային ծառայության մասին» և «Քաղաքացիական ծառայության մասին» օրենքներից բխող բոլոր ենթաօրենսդրական ակտերի ընդունում.

5. Բոլոր բուհերում «Հակակոռուպցիոն քաղաքականության հիմունքներ» առարկայի դասավանդման ծրագրերի մշակում և այլն:

Եվ այսպես «կենսագործում» ենք հակակոռուպցիոն ոլորտում Կառավարության քաղաքականությունն ու Վարչապետի նախանշած ելակետերը…

Վերջում, որպես խնդրանք, դադարեք իբրև սեփական աշխատանքի արդյունք ներկայացնել ոլորտային այն ռազմավարությունները, որոնք գրեթե ամբողջությամբ մշակվել են արդարադատության նախարարության նախկին ղեկավար կազմի ժամանակ: Դրա մասին բոլոր փաստերը հանրայնացված են»,-նշել է նա: