Նախաքննության բացերը վերհանելով՝ կարող ենք ստիպել վերսկսել նախաքննությունը. Տիգրան Եգորյան

«Հարսնաքարի» գործով նախաքննությունն ավարտվել է: Վեց մեղադրյալների մասով գործի նյութերն անջատվել են և տրամադրվել կողմերին՝ ծանոթանալու:

Մայր գործում մնացել է չպարզված անձանց մասը, որով նախաքննությունը շարունակվելու է:

Երբ կողմերը կավարտեն ծանոթացումը գործի նյութերին, այդ ժամանակ կկազմվի մեղադրական եզրակացություն, կհաստատվի և կուղարկվի դատարան: Այս մասին Լուրեր.com-ի հետ զրույցում ասաց ՀՀ Ոստիկանության լրատվության և հասարակայնության հետ կապերի բաժնի աշխատակից Արմեն Մալխասյանը:

Լուրեր.com-ը զրուցեց Վահե Ավետյանի իրավահաջորդի (հոր) փաստաբան Տիգրան Եգորյանի հետ՝ ճշտելու՝ արդյոք սա գործը կոծկելու միջո՞ց է, և արդյոք այն չի՞ ունեցել իր նախադեպերը:

Տիգրան Եգորյանը նշեց, որ այս գործն ունեցել է իր նախադեպերն ի դեմս Մարտի 1-ի և Հոկտեմբերի 27-ի գործերի, երբ գործից մաս է անջատվել և մոռացության մատնվել, բայց ասել, թե փորձ է արվում գործը կոծկել, Տիգրան Եգորյանը չի կարող:

«Մինչև չծանոթանանք նյութերին և չհասկանանք նախաքննության ընթացքում ինչ գործողություններ են արել, ինչ գործողություններ պետք է անեին, բայց չեն արել, ինչ գործողություններ են սխալ արել, մենք չենք կարող հստակ ասել, որ փորձել են կոծկել գործը:

Մենք պետք է իրենց բոլոր բացերը վեր հանենք: Երբ վերհանենք, կտանք մեր եզրակացությունը, կշարադրենք մեր ենթադրությունները, որ այս-այս բացերը կան նախաքննությունում, ընդհուպ հնարավոր է, որ բացահայտելով որոշակի բացեր՝ կարող ենք հանգեցնել նրան, որ նախաքննությունը վերսկսվի՝ կատարելու համապատասխան խնդիրներ: Սա է խնդրի մեխը:

Արդյոք նրանք պատրա՞ստ են վերսկսել նախաքննությունը, երբ մենք բացերը վեր հանենք: Աշխատանքի դեռ շատ ժամանակ և ծավալներ ունենք»:

Գայանե Համբարձումյան