Գեորգի Կուտոյանի ողբերգությունը «բանանային պետության ախտանիշ է»․ Արմեն Այվազյան

«Արարատ» ռազմավարագիտական կենտրոնի տնօրեն, պատմաբան և քաղաքագիտության դոկտոր Արմեն Այվազյանն իր ֆեյսբուքյան էջում գրել է․

«Գ. ԿՈՒՏՈՅԱՆԻ ՈՂԲԵՐԳՈՒԹՅՈՒՆԸ «ԲԱՆԱՆԱՅԻՆ ՊԵՏՈՒԹՅԱՆ» ԱԽՏԱՆԻՇ Է (ՈՐՈՇ ԴԻՏԱՐԿՈՒՄՆԵՐ)

— ԱԱԾ նախկին տնօրեն Գեորգի Կուտոյանի սպանության կամ ինքնասպանության մեղավորությունը հանրային քննարկումներում դրվում է՝ կախված քաղաքական հակվածություններից՝ կա՛մ նախկին, կա՛մ գործող իշխանությունների վրա։ Զարմանալիորեն, իսպառ չի շոշափվում ևս մեկ հնարավոր վարկած, այն է՝ այդ ոճրագործությունն իրականացրել են օտար, մասնավորապես թշնամի պետությունների հատուկ ծառայությունները՝ նպատակ ունենալով խարխլել Հայաստանի ներքին կայունությունն ու անվտանգությունը, այդ թվում՝ միմյանց դեմ տրամադրելով հասարակության տարբեր խմբերին։

— Հետխորհրդային Հայաստանում բարձրագույն պաշտոնյաների (շատ դեպքերում՝ չբացահայտված) սպանությունների ու «ինքնասպանությունների» անվերջանալի շղթան նախևառաջ ի ցույց է դնում մեզանում պետականաշինության վիթխարի ձախողումները, մասնավորապես ազգային անվտանգության համակարգի ծայրաստիճան թուլությունը։

— Ինչպես նախկին, այնպես էլ ներկա իշխանությունները ծայրահեղ անլուրջ վերաբերմունք են դրսևորում Հայաստանի անվտանգության նկատմամբ։ Պարզվում է, ՀՀ ԱԱԾ նախկին տնօրենը պաշտոնից զրկվելուց հետո մեկնել է Մեծ Բրիտանիա՝ Քեմբրիջի համալսարանում մագիտրոսական ինչ-որ գծով ուսում ստանալու։ Հարց տանք Սերժ Սարգսյանին ու նրա խունտայի ներկայացուցիչներին. ինչու՞ էիք գերպատասխանատու ղեկավար պաշտոնի նշանակել մեկին, ում ուսումը դեռևս անկատար էր, կենսափորձն էլ այդ դիրքի համար՝ անբավարար։
Հարց տանք նաև ներկա լիբերալ իշխանության ներկայացուցիչներին. ինչպե՞ս եք թույլ տվել պետական կարևորագույն գաղտնիքներին տիրապետող գլխավոր դեմքին՝ ԱԱԾ նախկին տնօրենին, պաշտոնավարելուց անմիջապես հետո երկրից բացակայել, այն էլ՝ երկար ժամանակով։ Չե՞ք վախեցել, որ, օրինակ, թուրքական կամ ադրբեջանական հետախուզությունը կարող են նրան առևանգել ու հարցաքննել կամ նույնը կարող են անել նրանց դաշնակից պետությունների հատուկ ծառայությունները։ Այնինչ Գ. Կուտոյանը պետք է առնվազն 5-10 տարի մնար Հայաստանում, որտեղ պարտավոր էին ըստ արժանվույն ապահովել նրա անվտանգությունը։ Ասվածը լիովին վերաբերում է նաև ՀՀ նախկին պաշտպանության նախարար Վիգեն Սարգսյանին, ով արդեն երկար ժամանակ է, ինչ ևս «ուսումնառության» է մեկնել արտասահման՝ ԱՄՆ։

— Նախկին բարձրագույն պաշտոնյաների արտասահման մեկնելու ավանդույթը սկսվում է 1990-ականներից՝ ՀՀ բազմաթիվ նախկին դեսպաններն ու դիվանագետները, նախարարները, երեք նախագահներից մեկը, վարչապետը, գլխավոր դատախազը, ոստիկանապետը և շատ ուրիշներ անմիջապես հայտնվել են արտասահմանում։ Սա ոչ այլ ինչ է, քան «բանանային պետության» պարզ ախտանիշ։ Մեզ պես պատերազմող երկրի համար այս ամենը հղի է շարունակական ցնցումներով ու նմանատիպ ողբերգություններով։ Ցավոք։

Հ.Գ. Խորապես ցավակցում եմ Գ. Կուտոյանի հարազատներին՝ նրա անժամանակ մահվան կապակցությամբ»։