Պետական պատվերի հայտ չի ներկայացվել

Վերջերս Մարդու իրավունքների պաշտպանին էր դիմել մի քաղաքացի, ում գործի ուսումնասիրությունը հանգեցրեց առողջապահության ոլորտում մեկ կարևոր խնդրի բարձրացմանը:

Արման Մանուկյանը (անուն-ազգանունը փոխված է) երկրորդ խմբի հաշմանդամ է, սակայն պետական պատվերի շրջանակներում չի օգտվում ստոմատոլոգիական բուժօգնության որոշ տեսակներից, մասնավորապես՝ օրթոպանտոմոգրամա հետազոտությունից: Առողջապահության նախարարությունից նրան տեղեկացրել էին, որ տվյալ ստոմատոլոգիական ծառայությունը պետական պատվերի շրջանակներում կազմակերպել հնարավոր չէ:

Պաշտպանը խնդրի վերաբերյալ պարզաբանումներ էր պահանջել Առողջապահության նախարարությունից: Արդյունքում պարզվել էր հետևյալը՝ օրթոպանտոմոգրամա հետազոտությունն իրականացվում է միայն վճարովի հիմունքներով, քանի որ ստոմատոլոգիական բժշկական օգնության և սպասարկման լիցենզիա ունեցող ոչ մի իրավաբանական անձ կամ անհատ ձեռնարկատեր օրթոպանտոմոգրամա հետազոտությունն իրականացնելու համար պետական պատվերի հայտ չի ներկայացրել:

Իսկ Առողջապահության նախարարությունը չի կարող բժշկական օգնության և սպասարկման լիցենզիա ունեցող որևէ իրավաբանական անձի կամ անհատ ձեռնարկատիրոջ առանց երկկողմանի համաձայնության, տրամադրել պետական պատվեր տվյալ հետազոտության համար:

Պատճառն այն է, որ պետության կողմից երաշխավորված անվճար ստոմատոլոգիական բուժօգնության ցանկում օրթոպանտոմոգրամա հետազոտությունը ներառված չէ, իսկ նշված ծառայությունն ընդգրկված չէ Առողջապահության նախարարի հրամանով նախատեսված այն բժշկական ծառայությունների ցանկում, որոնք տրամադրվում են վճարովի հիմունքներով բնակչության բոլոր խավերի համար /այդ թվում նաև սոցանապահով և հատուկ խմբերում ընդգրկվածների/:

Ստացվում է մի իրավիճակ, որ անձն ունի պետական պատվերի շրջանակներում անվճար բժշկական սպասարկում ստանալու իրավունք, սակայն չի կարող դրանից օգտվել, քանի որ ոչ մի բժշկական կազմակերպություն հայտ չի ներկայացրել տվյալ ծառայությունը պետական պատվերի շրջանակներում իրականացնելու համար: