Դատախազությունը և Ոստիկանությունը ինչ-որ գործընթաց են սկսել. Լարիսա Ալավերդյան

Ոստիկանության ՔԳՎ ՀԿԳ քննության վարչությունը, համարելով, որ «Հարսնաքար» ռեստորանային համալիրի բակում 2012-ի հունիսի 17-ին տեղի ունեցած դեպքի առթիվ հարուցված և վարչությունում քննվող քրեական գործով հավաքվել են բավարար ապացույցներ, հայտարարել է մի մասով նախաքննությունն ավարտելու և գործի նյութերը կողմերին՝ դրանց ծանոթանալու նպատակով տրամադրելու մասին:

Վահե Ավետյանի իրավահաջորդի և այժմ արդեն մնացած չորս տուժողների ներկայացուցիչներին գործի նյութերը տրամադրելուց հետո տեղեկացրել են, որ միջնորդությունները պետք է տրամադրվեն մեկ օրվա ընթացքում:

Նշենք, որ գործը երեք հատորից է, էջերի թիվը 1000-ից ավելի է:

Ավելացնենք, որ ավելի ուշ Դատախազությունը նախաքնչական մարմնին հանձնարել էր երկարաձգել գործի նյութերին ծանոթանալու ժամկետը:

«Հարսնաքարի գործով փաստաբաններին տրամադրվել է 5 աշխատանքային օր՝ գործի նյութերին ծանոթանալու համար: 

Լուրեր.com-ը զրուցեց Սլավոնական համալսարանի «Քաղաքականություն և իրավունք» ինստիտուտի տնօրեն Լարիսա Ալավերդյանի հետ, ճշտելու՝ թե ի՞նչ ենթատեքստ կար Ոստիկանությունից փաստաբաններին տրամադրված մեկ օրը, Դատախազության հանձնարարությամբ փոխելու՝ հինգ օր դարձնելու մեջ, և արդյոք հինգ օրը բավարա՞ր է միջնորդություններ ներկայացնելու համար:

Լարիսա Ալավերդյանը նշեց, որ այդ ժամանակահատվածը ոչ միայն անբավարար է, այլ այստեղ կա ավելի քան տարօրինակ կոշտություն ոստիկանության նախաքնչական մարմնի կողմից:

Ալավերդյանի համար անհասկանալի է այդ վերաբերմունքը, քանի որ օրենքը թույլ է տալիս տրամադրել ողջամիտ ժամանակ, որը որ խնդրում, պահանջում է տուժող կողմի դատապաշտպանը կամ իրավաբանը:

«Երեք հատորանոց գործի համար մեկ օր տրամադրելը ցավոք սրտի խոսում է Ոստիկանության վերաբերմունքի մասին, այլ ոչ թե մեր օրենքի: Նման վերաբերմունքը դատապարտելի է: Այն, որ Դատախազությունը տվյալ դեպքում տալիս է հինգ օր, նախ զարմանալի է, ինչո՞ւ չի ուզում բավարարի իրավաբանների պահանջը՝ տրամադրել մեկ ամիս կամ գոնե գտնի ողջամիտ մեկ այլ ժամանակ: Այստեղ կա նաև մեկ այլ հարց, ստացվում է, որ Դատախազությունը և Ոստիկանությունը, ինչ-որ գործընթաց են սկսել»,- ասաց Ալավերդյանը:

Նա նաև կարծիք հայտնեց, որ բոլոր դեպքերում, Վահե Ավետյանի դաժանաբար սպանության հետ կապված գործի շուրջ չպետք է այսպիսի գործընթաց լիներ. «Դա ուղղակի հասարակական պարսավանքի արժանի է և շատ լավ է, որ հասարակությունը գնում է և բողոքում է»:

Լարիսա Ալավերդյանը նշեց նաև, որ քրեական օրենսգրքի համապատասխան հոդվածները թույլ են տալիս ոչ թե կոշտ դիրքորոշումով հանդես գալ, այլ համագործակցել իրավապաշտպանների հետ: Սակայն, ըստ վերջինիս կարծիքի, ոստիկանության կամ դատախազության կողմից իրավապաշտպաններին ընդառաջելու ոչ մի նշույլ չի երևում:

Գայանե Համբարձումյան