Անհատական գրիչներ, դիմակներ, ձեռնոցներ. Արցախում պատրաստվում են նախագահական ընտրությանը

Նույնիսկ կորոնավիրուսով պայմանավորված իրավիճակը չի խանգարի վաղը՝ մարտի 31–ին, Արցախում կայանալիք  նախագահական ընտրությանը, որին մասնակցելու է 14 թեկնածու: ԼՈՒՐԵՐ.com-ի թղթակիցը զրուցեց Արցախի Կենտրոնական ընտրական հանձնաժողովի մամուլի քարտուղար Ելենա Հայրապետյանի հետ՝ պարզելու, թե ստեղծված պայմաններում ինչպիսի անվտանգության միջոցառումներ են իրականացվելու և դիտորդական ու քաղաքացիական մասնակցության ինչպիսի ակտիվություն է սպասվում:

«Հայաստանի 2-3 լրատվամիջոցի ներկայացուցիչներ են, որ վերցրել են ընտրությունը լուսաբանելու հավատարմագրերը, գուցե մինչ օրվա վերջ մի քանիսը ևս գան: Նույնն է նաև դիտորդական առաքելություն իրականացնողների շրջանում, մի քանի հասարակական կազմակերպության ներկայացուցիչներ են եկել, էլի ՀՀ-ից, իսկ դեսպանատներից կամ արտասահմանից, հայտնի պատճառներով, դիտորդներ չկան»,-ասաց նա:

Հայրապետյանը նշեց, որ անվտանգության բոլոր միջոցառումները իրականցնելու են, ինչպես լրատվամիջոցների ներկայացուցիչների, դիտորդների, այնպես էլ՝ քաղաքացիների համար:

«Բոլոր տեղամասերում կլինեն անհատական գրիչներ, դիմակներ, ձեռնոցներ և ալկոգել՝ քաղաքացիների, դիտորդների և հանձնաժողովի անդամների համար»,-ընդգծեց մամուլի քարտուղարը:

Նա դժվարացավ պատասխանել այն հարցին, թե ընտրողների ինչպիսի ակտիվություն է ակնկալվում՝ նշելով, որ կորոնավիրուսի տարածման ֆոնին, նման կանխատեսում անելը դժվար է:

Հայրապետյանի խոսքով՝ լրատվամիջոցների ներկայացուցիչները նախ հանձնում են կորոնավիրուսի թեստը, որի բացասական լինելուց հետո միայն գնում Արցախ:

Անդրադառնալով մեր այն հարցին, թե այս շրջանում ընտրություն անցկացնելու վերաբերյալ Արցախի քաղաքացիները ինչպիսի վերաբերմունք ունեն, նա նշեց. «Ընտրությունների հետ կապված՝ Արցախում բացասական կարծիք չկա»: