Նախկին պաշտոնյային կպաշտպանի երեք փաստաբան

ՀՀ արդարադատության նախարարության քրեակատարողական վարչության նախկին պետ Սամվել Հովհաննիսյանի դեմ գործով որպես վերջինիս պաշտպաններ ներգրավվել են ևս երկու փաստաբան՝ Լուսինե Սահակյանը ու Երվանդ Վարոսյանը: Այս մասին «Փաստինֆո» գործակալության թղթակցին հայտնեց փաստաբան Լուսինե Սահակյանը: Այսպիսով, Սամվել Հովհաննիսյանի պաշտպանությունը կիրականացնեն երեք փասաբաններ՝ Վաղինակ Գևորգյանը, Լուսինե Սահակյանը ու Երվանդ Վարոսյանը:

Հիշեցնենք, որ Սավել Հովհաննիսյանը մեղադրվում է ՀՀ քրեական օրենսգրքի 38-35-104 հոդվածի 2-րդ մասի 7-րդ ու 8-րդ կետերով՝ շահադիտական դրդումներով, պատվերով սպանության նախապատրաստման կազմակերպում:

Ըստ մեղադրանքի, Ս.Հովհաննիսյանը՝ ստանալով առաջարկ կազմակերպելու ու իրագործելու «Գորիս» քրեակատարողական հիմնարկում պատիժը կրող դատապարտյալ Ջ.Սլոյանի սպանությունը, պարտավորվել է գտնել սպանության կատարողին ու միջնորդ հանդիսանալ վերջինիս ու պատվիրատուի միջև: 2012թ. մարտին դիմել է նախկինում երկու անգամ մի դատապարտվածի ու առաջարկել վարձատրության դիմաց կազմակերպել և իրագործել սպանությունը: Որոշ ժամանակ անց նախկին դատապարտյալը Ս.Հովհաննիսյանին տեղեկացրել է, որ «Դատապարտյալների հիվանդանոց» ՔԿՀ-ում պատիժը կրող դատապարտյալներից մեկը 7500 ԱՄՆ դոլար վարձատրության դիմաց համաձայնել է կատարել «Արթիկ» ՔԿՀ տեղափոխված Ջ.Սլոյանի սպանությունը՝ մահաբեր խտության թմրանյութի օգնությամբ: Ս.Հովհաննիսյանը որպես կանխավճար փոխանցել է 400 ԱՄՆ դոլար՝ նախապատրաստական աշխատանքների ծախսերը հոգալու համար: