Գունագեղ պատկերները՝ երեխայի իրավունքների մասին

Սեղանների վրա դրված նկարազարդ բացիկները պատմում էին երեխաների իրավունքների մասին: Երեխաները ներկում էին տարբեր գունագեղ պատկերներ, նկարում էին նկարներ և դրանց միջոցով փորձում ներկայացնել իրենց իրավունքները:

Այսպիսի գունազարդ, ուրախ և թեթև մթնոլորտ էր տիրում օգոստոսի 17-ին Եղեգնաձոր քաղաքի «Այգի» սրճարանում: Հրաշալի միջոցառմանը հրավիրված էին նաև Պաշտպանի աշխատակազմի Վայոց Ձորի տարածքային գրասենյակի աշխատակիցները, մարզպետարանի «Ընտանիքի, կանանց և երեխաների իրավունքների պաշտպանության» բաժնի աշխատակիցները, ծնողներ և հասարակության ակտիվ անդամներ:

«Մեզ համար ամենակարևորը երեխայի պաշտպանությունն է, ուստի Մարդու իրավունքների պաշտպանի գրասենյակը պատրաստ է աջակցել ցանկացած երեխայի, եթե ոտնահարվել են նրա իրավունքները»,-միջոցառման ժամանակ իր խոսքում նշեց Վայոց Ձորի տարածքային գրասենյակի համակարգող Կարինե Մովսիսյանը: Նա երեխաներին և նրանց ծնողներին տեղեկացրեց նաև, թե ինչպես և որ դեպքերում դիմել Պաշտպանի օգնությանը:

Միջոցառմանը մասնակցում էին 50-ից ավելի երեխաներ, որոնք նոր գիտելիքներ և դրական լիցքեր ստացան գույների զարմանահրաշ աշխարհից, անկեղծ տրամադրող մթնոլորտից և հաճելի հյուրասիրությունից:

«Փրկենք երեխաներին» միջազգային կազմակերպությունը, «Հույս և ապագա» ՀԿ-ն և Եղեգնաձորի քաղաքապետարնն իր փոքր ֆինանսական ներդրումով այդ գեղեցիկ միջոցառման կազմակերպիչներն էին, որոնց ներկայացուցիչները նույնպես հանդես եկան ողջույնի և երեխաներին քաջալերող խոսքով:

Միջոցառումն ավարտվեց, սակայն օրվա խորհուրդը դեռ երկար կմնա: