Քաղաքապետարանի ներկայացուցիչը հերքում է, մինչդեռ մեղադրվող ընկերության ներկայացուցիչը ընդունում է փաստը

Այսօր Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում տեղի է ունեցել «Սուրենյանց փողոցի բնակիչներն ընդդեմ «Մեծ Մհակ» ընկերության դատական գործով նիստ։ Սուրենյանց փողոցի բնակիչները բողոքում են հանրային նշանակության տարածքում ծառահատման միջոցով հերթական ռեստորանի կամ սրճարանի կառուցման դեմ։

Նախորդ նիստին պատասխանող կողմի ներկայացուցիչները հերքել էին ծառահատումների փաստը, և դատարանը որոշել էր դեպքի վայրում տեղազննություն իրակացնել։

«Այսօրվա նիստից պարզ դարձավ, որ դատավորը ևս հակված է հավատալ ծառահատման փաստին։ Ծառերն արմատախիլ են արվել, փոսեր են տեղերում»,- մեզ հետ զրույցում ասաց «Մենք ենք այս քաղաքի տերը» նախաձեռնության անդամ Արթուր Ավթանդիլյանը։ Ըստ նրա՝ դատին ներկա երկու պատասխանող կողմերից միայն քաղաքապետարանի ներկայացուցիչն է փորձել հերքել փոսերի՝ ծառահատման հետևանք լինելը, այն դեպքում, երբ անգամ ծառահատման մեջ մեղադրվող ընկերության ներկայացուցիչն է անուղղակիորեն ընդունել դա։

Դատավարության ընթացքում հայցվոր կողմի փաստաբան Մնացական Ղազարյանը միջնորդություն է ներկայացրել նաև դատաշինարարատեխնիկական և սեյսմիկ փորձաքննություն իրականացնելու վերաբերյալ։ Հակառակ պատասխանող կողմի պահանջին՝ դատարանը բավարարել է միջնորդությունը։ Դատը հետաձգվել է մինչև փորձաքննության իրականացումն ու հանրայնացումը։

Նելլի Ավետիսյան