Թիկունքից «թաքուն» խփողները

Աժ-ում ԼՀԿ ղեկավար Էդմոն Մարուքյանի և «Իմ քայլը» խմբակցության պատգամավոր Սասուն Միքայելյանի միջև տեղի ունեցած ծեծկռտուքի ժամանակ հանրությունը ֆիքսեց, թե ովքեր խփեցին Մարուքյանին թիկունքից: Այդ մասին հայտարարեց նաև ինքը՝ Էդմոն Մարուքյանը, ասելով, թե իրեն մեջքից խփող է եղել. «էն ո՞վ եկավ թաքուն մեջքից խփեց, մեջքից խփո՞ւմ եք, արա՛»: Տեսանյութում պարզ երևում է, որ նրան հարվածողները «Իմ քայլը» խմբակցության պատգամավոր Արտակ Մանուկյանն ու Տավուշի նախկին մարզպետ, Նիկոլ Փաշինյանի քավոր, «Իմ քայլը» խմբակցության պատգամավոր Վահե Ղալումյանն են: Վերջինս հարձակվեց Մարուքյանի վրա, բռնեց նրա գլուխն ու սկսեց հարվածներ հասցնել, Արտակ Մանուկյանն էլ, լինելով լուրջ տնտեսագետ ու համարվելով իշխանական թիմի քաղաքակրթության մարմնացումներից մեկը, չկարողացավ զսպել մոլեգնած զայրույթը և հարձակվեց Մարուքյանի վրա։ Ծեծկռտուքից հետո արդեն հանրության շրջանում հասունանում է վերջիններիս մանդատները վայր դնելու պահանջը: Հիշեցնենք, որ միջադեպի պատճառը Էդմոն Մարուքյանի ելույթի ժամանակ Սասուն Միքայելյանի կողմից հնչեցված արտահայտություններն էին՝ «կցխեմ», «վիզդ կկտրեմ»: