Կենտրոնական բանկը մի քանի լրացում է կատարել

Կենտրոնական բանկի խորհուրդը օգոստոսի 21-ի նիստում, որը վարել է ԿԲ նախագահ Արթուր Ջավադյանը, հաստատել է ՀՀ ԿԲ 2012 թ. երկրորդ եռամսյակի «Բանբերը» և ՀՀ ԿԲ 2012 թ. առաջին կիսամյակի «Ֆինանսական կայունության հաշվետվությունը»: Լրացումներ են կատարվել «Համահայկական բանկի լիցենզավորումը, Համահայկական բանկի կանոնադրական հիմնադրամում մասնակցություն ձեռք բերելը և ներկայացվող փաստաթղթերը, Համահայկական բանկի ղեկավարների (բացառությամբ խորհրդի անդամների, նախագահի ու տարածքային ստորաբաժանումների ղեկավարների) որակավորումը և գրանցումը» կանոնակարգ 01/02-ում:

ԿԲ մամուլի ծառայությունից հայտնում են, որ խորհրդի որոշմամբ ուժը կորցրած է ճանաչվել «Դելտա-Ֆրագմենտ» ՍՊԸ-ին տրամադրված արտարժույթի առուվաճառքի թիվ 647 լիցենզիան, վերաձևակերպվել են անհատ ձեռնարկատեր Արմեն Ենոքյան արտարժույթի առուվաճառքի թիվ 452, անհատ ձեռնարկատեր Վահագն Խաչատրյան փոխանակման կետի արտարժույթի առուվաճառքի թիվ 418, անհատ ձեռնարկատեր Կարապետ Խաչատրյան փոխանակման կետի արտարժույթի առուվաճառքի թիվ 625, անհատ ձեռնարկատեր Վարուժան Ավետիսյան փոխանակման կետի արտարժույթի առուվաճառքի թիվ 478 և «ՏՈՆՏՈՆ» ՍՊԸ-ի ներդրումային ծառայությունների մատուցման լիցենզիաները:

Խորհուրդը «Մոբի Դրամ» ՓԲԸ-ին (դրամական (փողային) փոխանցումներ իրականացնող կազմակերպությանը) էլեկտրոնային փող թողարկելու թույլտվություն է տրամադրել, իսկ «ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ» ՓԲԸ-ին՝ «ԷՔՍՊՐԵՍ ՄԱՆԻ» արտասահմանյան վճարահաշվարկային համակարգում մասնակցության թույլտվություն: