Թեկնածուին ահաբեկո՞ւմ են ոստիկանության բաժնում

Այսօր Lurer.com-ն ահազանգ ստացավ, որ Շիրակի մարզի Սպանդարյան գյուղում սրվել են հարաբերությունները գործող համայնքապետ Վաղինակ Բաղդասարյանին աջակցող Տիգրան Պետրոսյանի (Արթիկի ոստիկանապետ) և գյուղապետի ԲՀԿ-ական թեկնածու Էդիկ Կուրղինյանի միջև։ Ըստ վերջինիս շրջապատից փոխանցված տեղեկությունների, սույն ոստիկանապետն այս օրերին կոչ է անում չքվեարկել Կուրղինյանի օգտին՝ պաշտոնական դիրքը չարաշահելով ու մարդկանց ահաբեկելով։

Lurer.com-ն այս առիթով զրուցեց թեկնածու Կուրղինյանի հետ՝ առավել մանրամասն պարզելու՝ ինչն ինչոց է և արդյո՞ք իսկապես Արթիկի ոստիկանապետը գերազանցում է իր լիազորություններն ու նաև քարոզարշավ անում։

Սակայն Էդիկ Կուրղինյանը քիչ առաջ մեզ հետ զրույցում հերքեց թե՜ այս լուրերը, թե՜ այլ լրատվամիջոցներին իր իսկ տված տեղեկությունները։ «Ես ոստիկանապետի հետ ոչ մի պրոբլեմ չունեմ»,- հայտարարեց նա՝ հավելելով. «Էսիկ գեղ է, էսիկ ազատ անկախ Հայաստան է, էստեղ չի կարելի մարդկանց վախեցնել, էսիկ քաղաք չէ»։

Հետո կրկին շեշտեց, որ ոստիկանապետի հետ խնդիրներ չունի. «ինքը անձամբ ինձ ոչ մի բան չի ասել»։ Մեր այն հարցին՝ իր ասելով գյուղում որևէ խնդիր չկա՞ նախընտրական պայքարում, կրկնեց. «ես ինչ ասել եմ,  էիլ կրկնում եմ՝ ես իրա հետ ոչ մի խնդիր չունեմ»։

Մեր զրույցից անմիջապես հետո նույն աղբյուրները կրկին ահազանգեցին, այս անգամ այն մասին, որ Էդիկ Կուրղինյանն այս պահին գտնվում է Արթիկի ոստիկանապետի աշխատասենյակում և մեր զանգին պատասխանել է հենց ոստիկանությունից։

Քիչ առաջ տեղեկացանք, որ Կուրղինյանը մի քանի ժամ Արթիկի ոստիկանությունում անցկացնելուց հետո դուրս է եկել այնտեղից:

Lurer.com-ն ուշի ուշով հետևում է այս զարգացումներին և լրացուցիչ տեղեկության դեպքում՝ կիրազեկի։