Սեպտեմբերի 23-ին կայանալիք ՏԻՄ ընտրություններում թեկնածուների առաջադրման վերջնաժամկետը օգոստոսի 24-ն է

Օգոստոսի 19-ից մեկնարկել է Արագածոտնի, Գեղարքունիքի, Կոտայքի, Վայոց Ձորի և Տավուշի մարզերի 318 համայնքներում սեպտեմբերի 23-ին անցկացվելիք տեղական ինքնակառավարման մարմինների ընտրություններում թեկնածուների առաջադրման գործընթացը: Թեկնածուների գրանցման փաստաթղթերի ընտրատարածքային ընտրական հանձնաժողով ներկայացնելու վերջնաժամկետը օգոստոսի 24-ի ժամը 18-ն է:

Ըստ «Փաստինֆո» գործակալության՝ ԿԸՀ նախագահի մամուլի քարտուղար Հերմինե Հարությունյանը հաղորդում է, որ սեպտեմբերի 23-ին ՏԻՄ ընտրություններ են անցկացվելու Արագածոտնի մարզի 114 համայնքներից 99-ում, Գեղարքունիքի 92 համայնքներից 64-ում, Կոտայքի 67 համայնքներից 65-ում, Վայոց Ձորի 44 համայնքներից 36-ում, Տավուշի 62 համայնքներից 54-ում:

Ըստ ԿԸՀ տվյալների, օգոստոսի 22-ի կեսօրի դրությամբ ընդհանուր առմամբ առաջադրված էին համայնքի ղեկավարի 267 և ավագանու անդամի 563 թեկնածուներ: Ոչ բոլոր համայնքներում կային առաջադրումներ: Դրանց թվում են Կոտայքի մարզի Ծաղկաձոր և Եղվարդ քաղաքային համայնքները, որոնցում դեռևս քաղաքապետի թեկնածուներ առաջադրված չեն:

Մյուս քաղաքային համայնքներում պատկերը հետևյալն է.

Արագածոտնի մարզի Աշտարակ քաղաքային համայնքի ղեկավարի առայժմ միակ թեկնածուն անկուսակցական մենատնտես Ռազմիկ Տերտերյանն է, Ապարանում՝ ՀՀԿ-ի կողմից առաջադրված գործող քաղաքապետ, հանրապետական Գոռ Աբրահամյանը:

Գեղարքունիքի մարզի Գավառ քաղաքային համայնքի ղեկավարի թեկնածուներ են ինքնաառաջադրվել երկու անկուսակցականներ՝ գործող քաղաքապետ Գուրգեն Մարտիրոսյանը և «Քյավառ» հեռուստաընկերության տնօրեն Արմեն Գալստյանը: Ճամբարակում ՀՀԿ-ի կողմից առաջադրվել է գործող քաղաքապետ, հանրապետական Յուրիկ Ավալյանը: Մարտունիում առաջադրվել է քաղաքապետի երեք թեկնածու՝ ՀՀԿ-ի կողմից գործող քաղաքապետ, հանրապետական Բագրատ Հարությունյանը, ինքնաառաջադրված անկուսակցական Թաթուլ Ավետիսյանը և ՀՀԿ-ական Վարդան Բաղդասարյանը: Սևան քաղաքում ինքնաառաջադրված է անկուսակցական Արա Սմբատյանը: Վարդենիսում առաջադրված են երեք թեկնածուներ՝ ՀՀԿ-ի կողմից գործող քաղաքապետ, հանրապետական Վոլոդյա Խլոյանը, ինքնաառաջադրված ՀՀԿ անդամ Վիկտոր Մկրտչյանը և ՀՅԴ անդամ Կամո Պետրոսյանը:

Կոտայքի մարզի Աբովյան քաղաքում «Բարգավաճ Հայաստան» կուսակցության կողմից առաջադրված է գործող քաղաքապետ Կարապետ Գուլոյանը:

Վայոց Ձորի մարզի Վայք քաղաքում առայժմ 3 թեկնածու է՝ ՀՀԿ-ի կողմից առաջադրված գործող քաղաքապետ, հանրապետական Հարություն Սարգսյանը, ինքնաառաջադրված «Բարգավաճ Հայաստան» կուսակցության անդամ Բաբա Բաբայանը և անկուսակցական Թարո Ավետյանը: Եղեգնաձորում առայժմ առաջադրված է քաղաքապետի մեկ թեկնածու՝ «Բարգավաճ Հայաստան» կուսակցության ներկայացուցիչ Դավիթ Հարությունյանը:

Տավուշի մարզի Բերդ քաղաքում ՀՀԿ-ի կողմից առաջադրված է գործող քաղաքապետ, հանրապետական Անդրանիկ Շառյանը և ինքնաառաջադրված ՀՀԿ անդամ Հարություն Մանուչարյանը: Դիլիջանում երկու թեկնածու է՝ ՀՀԿ-ի կողմից առաջադրված գործող քաղաքապետ, հանրապետական Արմեն Սանթրոսյանը և ինքնաառաջադրված ՀՀ փաստաբանների պալատի փաստաբան, անկուսակցական Գուրգեն Հարությունյանը: Նոյեմբերյանում առաջադրված է երկու թեկնածու' ՀՀԿ-ի կողմից գործող քաղաքապետ, հանրապետական Վանուշ Ամիրաղյանը և ինքնաառաջադրված անկուսակցական Քաջիկ Անանյանը: