Սպիտակի քաղաքապետը չի կատարում դատարանի վճիռը

2010թ. դեկտեմբերի 30-ի որոշմամբ ՀՀ վերաքննիչ քաղաքացիական դատարանը՝ դատավորներ Ա. Խառատյանի, Կ. Չիլինգարյանի ու Ա. Պետրոսյանի նախագահությամբ, պարտավորեցրել է Սպիտակի քաղաքապետարանին կատարելու Արտակ Հակոբյանի հետ 26.11.2002թ. կնքված պայմանագրով ստանձնած պարտավորությունները: Մասնավորապես, դատարանի որոշմամբ, քաղաքապետարանը պարտավորեցվում է Սպիտակ քաղաքի Ալ. Մանուկյան 21 հասցեի իրացված բնակարանի դիմաց որպես փոխհատուցում հատկացնել երկսենյականոց բնակարան:

Վերաքննիչ դատարանի որոշմամբ, մերժվել է պատասխանող կողմի՝ Սպիտակի քաղաքապետարանի /քաղաքապետ Գագիկ Սահակյան/ վերաքննիչ բողոքն ընդդեմ Լոռու մարզի ընդհանուր իրավասության դատարանի 30.09.2010թ վճռի:

Այդուհանդերձ, առ այսօր դատարանի որոշումը չի կատարվել:

Խնդրի առնչությամբ ՀՀ տարածքային կառավարման նախարար, փոխվարչապետ Արմեն Գևորգյանին ուղղված «Փաստինֆո»-ի հարցմանն ի պատասխան նախարարության հասարակայնության հետ կապերի բաժնից ստացված պատասխանում նշվում է, որ դատարանների որոշումները ենթակա են կատարման: ՏԿՆ-ն 21.08.2012թ. նամակով տեղեկացրել են նաև, որ «Փաստինֆո»-ի հարցումը հասցեագրվել է Լոռու մարզպետարանին՝ հարցն ուսումնասիրելու և դրա հետ կապված տեղեկություններ ներկայացնելու համար: Այս պահի դրությամբ խմբագրությունը որևէ պատասխան կամ պարզաբանում չի ստացել: