Պետք էր կասկածի տակ առնվեր Ռուբեն Հայրապետյանի առնչությունը այս հանցագործությանը. փաստաբան

«Հարսնաքար» ռեստորանային համալիրի տարածքում հունիսի 17-ի բռնարարքի արդյունքում սպանված Վահե Ավետյանի իրավահաջորդի փաստաբանները այսօր լրագրողների հետ հանդիպմանը հանդես եկան հայտարարությամբ.- «Արձագանագրում ենք, որ սույն գործով մինչդատական վարույթն ընթացել է քրեական և քրեական դատավարության օրենսգրքերի բազմաթիվ կոպտագույն խախտումներով։ Մեզ՝ տուժողի իրավահաջորդի ներկայացուցիչներիս առջև, հետևողականորեն հարուցվել են լրջագույն խոչընդոտներ վարույթին ներգրավվելու, գործին ծանոթանալու, դրա վերաբերյալ մեր միջնորդությունները ներկայացնելու և նախաքննության փուլում պատշաճ մասնակցություն ունենալու հարցերում։

Ցանկանում ենք ևս մեկ անգամ հաստատել, որ պայքարելու ենք այս ապօրինությունների դեմ մինչև վերջ՝ ներպետական և վերպետական բոլոր ատյաններում՝ օգտագործելով ՀՀ և միջազգային օրենսդրությամբ մեզ ընձեռված բոլոր հնարավորությունները հանուն արդարության և օրենքի գերակայության։ Միևնույն ժամանակ, իրավապահ և արդարադատության մարմիններին ու պաշտոնատար անձանց սթափության և օրինապատշաճ վարքագիծ դրսևորելու կոչ ենք անում՝ միևնույն ժամանակ նրանց զգուշացնելով օրենքի և արդարության առջև նրանցից յուրաքանչյուրի անհատական պատասխանատվության անխուսափելիության մասին»։

«Քրեական գործի նյութերում առկա են նաև փաստեր, որոնք ցույց են տալիս, որ վեց մեղադրյալներից հինգը, բացի մատուցողից, այդ օրն ուղեկցել են Ռուբեն Հայրապետյանին, Երևանից Սևան գնալու և հետ վերադառնալու ընթացքում։ Սա ապացուցում է, որ հակառակ գործում առկա գործող կեղծ պայմանագրերի և Ոստիկանության ՀԿԳ քննչական վարչության պետ Վահագն Հարությունյանի պնդումների՝ այս մարդիկ եղել են Ռուբեն Հայրապետյանի թիկնազորի անդամները»-այս մասին փաստաբան նշեց Տիգրան Եգորյանը՝ մեջբերելով հայտարարության տեքստից։

Այս կապակցությամբ փաստաբանները միջնորդել են քննչական խմբին, որպեսզի Ռուբեն Հայրապետյանը ևս հարցաքննության ենթարկվի, սակայն ի պատասխան այս միջնորդության՝ քննիչ Ռ. Մկրտչյանը նշել է, որ օրենսգիրքը «որպես կասկածյալ ներգրավվելու» հասկացություն չի նախատեսում։ Մինչդեռ, ըստ Տիգրան Եգորյանի, կասկածյալն այն անձն է, որը կասկածվում է հանցանք կատարելու մեջ՝ տվյալ դեպքում պետք էր կասկածի տակ առնվեր Ռուբեն Հայրապետյանի առնչությունը այս հանցագործությանը։