Կողոպտիչը վնասել է ոստիկանին. հանցագործը ձերբակալված է

Ինչպես նախկինում տեղեկացրել էին Ոստիկանությունից, օգոստոսի 6-ին, ժամը 14.30-ին, ոստիկանության ծառայողներին էր մոտեցել 1982 թ. ծնված Ժենյա Ե.-ն և հայտնել, որ Երևանի Ա. Խաչատրյան փողոցի թիվ 26 շենքի մոտ տեսել է այն կողոպտչին, որը հուլիսի 14-ին նույն շենքի մոտ բացահայտ հափշտակել է իր պարանոցի ոսկյա շղթան:

Ոստիկանները քաղաքացուհու նշած վայրից փորձել էին բերման ենթարկել 1988 թ. ծնված Ստեփան Բ.-ին, սակայն նա ձեռքով հարվածելով ոստիկանության ծառայողներից մեկի գլխին՝ պատճառել էր վնասվածք և դիմել փախուստի, բայց քիչ անց մյուս ոստիկանները հետապնդելով նրան՝ բռնել և բերման էին ենթարկել բաժին:

Մարմնական վնասվածք ստացած ոստիկանը տեղափոխվել էր հիվանդանոց:

Նշանակվել էր դատաբժշկական փորձաքննություն:

Օգոստոսի 25-ին, ժամը 12.00-ին, ոստիկանության Արաբկիրի բաժին է դիմել 1951 թ. ծնված Վիկտորիա Հ.-ն և հայտնել, որ «Արմենիա» հեռուստաընկերությամբ դիտելով «Հերթապահ մաս» հաղորդաշարի թողարկումը՝ ճանաչել է Ստեփան Բ.-ին, որը հուլիսին իրենց շենքի մոտ բացահայտ հափշտակել է իր պարանոցի ոսկյա շղթան' խաչով, և դիմել փախուստի' պատճառելով 160.000 դրամի նյութական վնաս:

Նույն օրը ոստիկանություն է դիմել նաև 1982 թ. ծնված Արմինե Ռ.-ն. նա նույնպես հեռուստահաղորդումից ճանաչել է Ստեփան Բ.-ին, հուլիսի 25-ին Ա. Խաչատրյան փողոցի թիվ 26 շենքի մոտ բացահայտ հափշտակել է իր պարանոցի ոսկյա շղթան' խաչով, և դիմել փախուստի:

Ոստիկանությունից տեղեկացնում են, որ Ստեփան Բ.-ն ձերբակալված է:

Հարուցված քրեական գործի նախաքննոթյունը շարունակվում է: