Նաիրա Զոհրաբյանի առաջարկը ԿԸՀ-ին

«Այն, որ մենք շատ արատավոր ընտրական ավանդույթ ունենք, վստահ եմ՝ որևէ մեկի համար գաղտնիք չէ։ Այն, որ ընտրակեղծարարության ինստիտուտը մեզանում շատ հմուտ է և լավ զարգացած, թերևս փաստ է։ Եվ այն, որ որոշակի վերահսկողական մեխանիզմներ պետք են, մասնավորապես,  կրկնակի քվեարկությունները բացառելու համար, ևս ակնհայտ է»,-անդրադառնալով ԿԸՀ-ի դրոշմակնիքների վերացման մասին առաջարկին՝ Lurer.com-ի հետ զրույցում ասաց ԱԺ ԲՀԿ խմբակցության քարտուղար Նաիրա Զոհրաբյանը։ 

Վերջինիս խոսքերով՝ վերահսկման տարբերակներից մեկը օքսիդացող դրոշմակնիքներն էին, ինչը, սակայն, չարդարեցրեց իրեն։ Խորհրդարանական ընտրությունները ցույց տվեցին, որ ուղղակիորեն այս մեխանիզմը իրեն չի արդարացնում և բացարձակապես ավելորդ է։

«Երբ ընտրությունների վերահսկողության հանձնաժողովում հարց բարձրացրեցի, որ կա հստակ ինֆորմացիա, որ դրոշմակնիքները օքսիդանում են,  և առաջարկեցի փորձաքննություն իրականացնել՝ արդյոք դրանք նախատեսված ժամկետից շուտ չեն օքսիդանում, հենց նույն օրը Տիգրան Մուկուչյանը այդ մտահոգությունները որակեց մտացածին՝ ասելով, որ նման բան ուղղակիորեն չի կարող լինել։ Բայց մայիսի 6-ի ընտրությունները ցույց տվեցին, թե ով էր իրականում մտացածին ենթադրություններ անում։ Ի դեպ, ընդամենը վերջերս Թալինում նույն պատմությունը կրկնվեց՝ 5 րոպե հետո կնիքները օքսիդանում էին»,-նշեց Նաիրա Զոհրաբյանը։ 

 Այս դեպքում «Բարգավաճ Հայաստան» կուսակցությունը առաջարկում է մատների թանաքոտման մեխանիզմը, ինչը, ի դեպ, բազմիցս առաջարկել է Վենետիկի հանձնաժողովը, չնայած Նաիրա Զոհրաբյանը վստահ է, որ հայ ընտրակեղծարարության միտքը մատների թանաքոտումը չեզոքացնելու շատ արագ մեխանիզմ ևս կգտնի, ինչպես դա արվեց դրոշմակնիքների դեպքում։ Իսկ ինչ վերաբերում է նախկին՝ սովորակական թանաքով արված կնիքներին, Նաիրա Զոհրաբյանը ասաց. «Նախկին տարբերակը լավ էր այնքանով, որ դրանք չէին օքսիդանում։ ԵԱՀԿ-ի, Վենետիկի հանձնաժողովի և այլ կառույցների հետ որոշակի խնդիրներ են այդ դեպքում առաջանում. նրանք պնդում են, որ դա մարդու իրավունքների ոտնահարում է, այսինքն՝ քվեարկությունը մարդու իրավունք է, ոչ թե՝ պարտականություն և չպետք է անձնագրում չջնջվող դրոշմակնիք լինի։ Ես կարծում եմ՝ մեր երկրի պարագայում պետք է շատ ավելի խստագույն միջոցներ կիրառվեն»։

Նելլի Ավետիսյան