World Politics Review. Թուրքիան մտադիր է նոր կայսրություն ստեղծել Կովկասում

Չնայած այն բանին, որ ժամանակին Թուրքիայի հանրահայտ արտաքին քաղաքականությունն Արևելքում ձախողվեց, այլ տարածաշրջաններում, մասնավորապես՝ Կովկասում, այն շարունակում է իր պտուղները տալ, եթե նույնիսկ Թուրքիան Վրաստանի հետ չունի այն ազգային կապերը, որոնցով կապված է Ադրբեջանի հետ: Թուրքերի համար Վրաստանը տարածաշրջանում էներգետիկ ռազմավարութան հիմնական տարրն է, ինչպես նաև՝ կարևոր բուֆեր Թուրքիայի և նրա մշտական մրցակից Ռուսաստանի միջև: Վրաստանը Թուրքիայի համար նաև առևտրական դաշնակից է: Գրում է World Politics Review թերթը: 

Վերջին տասնամյակներում Թուրքիայի ԱԳ նախարար Ահմեդ Դավիթօղլուի կողմից հռչակած սկզբունքը՝ «զրո կոնֆլիկտ հարևանների հետ», դարձել է Թուրքիայի արտաքին քաղաքականության հիմնական սկզբունքը: Տարածաշրջանում «անկախ» այդ քաղաքականությունը արդարացնում էր իրեն մասնավորապես Սիրիայի և Իրանի հետ հարաբերությունների լարվածության մեղմացմամբ, քանի դեռ «Արաբական գարունը» ի չիք դարձրեց այն: «Զրոյական խնդիրների» քաղաքականությունն իրեն արդարացրեց հատկապես Կովկասում՝ ի շնորհիվ այնտեղ նրա վաղեմի դաշնակից Ադրբեջանի և ավելի ու ավելի բարեկամական դարձող Վրաստանի:

Թուրքիայի և Վրաստանի միջև հարաբերությունների ամրապնդմանն ավելի է նպաստում համատեղ շահերի առկայությունը: Որքան Վրաստանն իր հիացմունքն է արտահայտում Արևմտյան Եվրոպայի և Հյուսիսային Ամերիկայի նկատմամբ, այնքան էլ չի մոռանում գովերգել իր թուրք դաշնակիցներին: Նա բազմիցս է ելույթ ունեցել վրացա-թուրքա-ադրբեջանական դաշինքի ստեղծման գաղափարներով, ինչը, ըստ էության, Թուրքիայի գաղափարն է: Չնայած այն բանին, որ մոտ ապագայում նման դաշինքներ դժվար կնքվեն, սակայն այնպիսի նախաձեռնությունները, ինչպիսիք են Տրապիզոնի հռչակագիրը, Բաքու-Թբիլիսի-Կարս երկաթուղու կառուցումը, Կովկասում կայունության հաստատման վերաբերյալ Թուրքիայի առաջարկը, նաև՝ առևտրական հարաբերությունների առկայությունն այդ երկրների միջև, ակնհայտորեն խոսում է այն մասին, որ այդ երեք երկրների միջև կայուն մերձեցում է գնում: