Die Presse. Բելառուսում կարող է ընտրվել Եվրոպայի վերջին բռնապետը

Համաշխարհային Մամուլ 23 Սեպտեմբեր, 2012 16:19

Բելառուսի 7 մլն. բնակիչ այսօր պատրաստվում է նոր պառլամենտ ընտրել: Ընտրություններն ուղեկցվում են կեղծարարության մեղադրանքներով և բոյկոտի կոչերով:

Նախկին ավտորիտար խորհրդային Բելառուսում այս կիրակի սկսվել են պառլամենտական ընտրությունները: Շուրջ 7 մլն քաղաքացի պատրսատվում է ընտրել Մինսկի պատգամավորների պալատի նոր 110 պատգամավորների: Պառակտված ընդդիմության մի մասը կոչ է անում բոյկոտել քվեարկությունը: Նրանք բողոքում են սպառնալիքների և ռեպրեսիաների դեմ: Պետության ղեկավար Ալեքսանդր Լուկաշենկոյի ընդդիմադիրներն անհանգստություն ունեն, որ կարող են կրկնվել նախորդ ընտրություններում պատահած կեղծումներն ու խախտումները: Լուկաշենկոն, որը 18 տարի երկաթյա բռունցքով իշխող նախագահ է համարվում և միջազգայնորեն ճանաչվել է որպես Եվրոպայի վերջին բռնապետ, ժխտում է այդ մեղադրանքները. գրում է թերթը:

Լուկաշենկոն հրաժարվել է նաև արևմտյան դիտորդներին և լրագրողներին մուտքի արտոնագիր տրամադրել: Քաղաքական մեկնաբանները սպասում են, որ այս անգամ ևս, ինչպես նախորդ` 2004 և 2008 թթ. ընտրությունների ժամանակ, Մինսկի պառլամենտի 110 մանդատները իշխող կուսակցության վստահված անձինք են զբաղեցնելու: Սկսած 1994թ.` Լուկաշենկոն երկաթյա բռունցքով կառավարում է Եվրոպայում աղքատ համարվող այդ երկիրը:

Այսպես, Լուկաշենկոյի հիմնական քաղաքական հակառակորդ Ալեքսանդր Միլինկևիչի թեկնածությունը մերժվել է, իսկ ընդդիմության մի մասը կոչ է անում բոյկոտել քվեարկությունը: Սակայն ընդդիմության մի հատվածն էլ 2010թ. նախագահական ընտրություններից հետո որևէ ցույց չի ծրագրում կազմակերպել: Այն ժամանակ Մինսկում դրանք դաժանորեն ճնշվեցին:

Ընտրությունների արդյունքը կհրապարակվի այս երկուշաբթի օրը: