Խոնավ շաքարավազ, քիչ կոֆեինով սուրճ. ում կարող է դիմել ՀՀ շարքային սպառողը

Կարագի փոխարեն սփրեդ, այծի կաթի մեջ աղիքային ցուպիկի խմբի եւ ստաֆիլոկոկի մանրէներ. փաստեր, որոնք վերջին շրջանում դարձան հասարակական տարբեր շրջանակների քննարկման առարկա։

Այժմ հասարակությունը որքանո՞վ է ապահովագրված նման վտանգներից, այս հարցի շուրջ ԼՈՒՐԵՐ.com-ը զրուցեց Սպառողների միության նաղագահ Արմեն Պողոսյանի հետ, ով ասաց. «Ապահովագրություն տալիս է ապահովագրությունը ու նա էլ չի տալիս: Մեր ապահովվածությունը շատ հեռու է բավարար լինելուց: Մենք անընդհատ հետևում ենք, ու անընդհատ թերություններ ենք հայտնաբերում, բայց պետք չէ շատ տագնապալի իրավիճակ ստեղծել: Ես 20 տարի է զբաղվում եմ այս գործով և գիտեմ, որ գրանցվել է երկու, երեք դեպք, երբ եղել է բռնկումներ առողջության հետ կապված: Մեկը եղել է ջրի վարակը Երևան քաղաքում և Ալավերդիում, մյուսն էլ եղավ խմորեղենի հետ կապված Վանաձորում»:

Արմեն Պողոսյանի հավաստմամբ՝ «Շեղումները, թերությունները շատ են: Օրինակ շաքարավազում կա չափազանց մեծ խոնավության տոկոս: Դա նորմալ է, իսկ քանի որ խոնավության տոկոսը շատ բարձր է, այդ դեպքում արդեն վնաս է գրպանին, այլ ոչ թէ առողջությանը: Նույնը նաև հացի և սուրճի ասպարեզներում: Մենք բազմաթիվ անգամ սուրճի փորձաքննություն ենք պատվիրել անցկացնել և պարզվել է, որ կոֆեինի պարունակությունը սուրճի մեջ քիչ է, և ստացվում է, որ սպառողը չի ստանում սուրճի իրական էֆեկտը և դա կրկին գրպանին է վնասում»,- նշեց Պողոսյանը:

Պատասխանելով ԼՈՒՐԵՐ.com-ի այն հարցին, թե ինչպես պաշտպանի սպառողը իր շահերը, եթե անորակ սնունդ է ձեռք բերել, միության նախագահն ասաց. «Կիրառական և հստակ խորհուրդը հետևյալն է. սպառողը պետք է իմանա, որ իրեն պաշտպանում են երեք կառույց՝ առաջինը դա կոչվում է Սննդի պետական ծառայություն, որը գյուղնախարարության համակարգում է գտնվում: Պետք է չզլանալ և զանգել այնտեղ:

Երկրորդը՝ հասարակական կառույցներին այդ թվում նաև Հայաստանի սպառողների ասոցացիաին: Մեզ գտնելը հեշտ է, մեր տվյալները կան նաև սփյուռում: Եվ երրորդ. մենք՝ բոլոր սպառողներս, պետք է իմանանք, որ տեղական բոլոր կառավարման մարմինները գլխով պատասխանատու են իրենց տարածքում առևտրի կանոնների, առևտրի կազմակերպման հետ կապված բոլոր հարցերի համար: Ու նույնպես պարտավոր են միջամտել»: