Վրաստանը աճ է գրանցել խոսքի ազատության հարցում, իսկ Ադրբեջանը կանգնած է այն կորցնելու վտանգի առջև

Freedom House ոչ պետական կազմակերպության կողմից հրապարակվել է այն երկրների ցուցակը, որոնց իշխանությունները տակտիկական միջոցներով շահարկում են տեղեկատվությունը՝ համացանցում բնակչության վրա ազդեցությունն ուժեղացնելու համար:

Հետազոտությունն ընդգրկել է 47 երկիր: Հաշվետվությունը պարզաբանում է, թե որքան ակտիվորեն է այս կամ այն երկիրը շահարկում համացանցում տեղ գտած տեղեկության ազատ հոսքը՝ երկրի բնակչությանը կառավարելու համար: Խոսքն առաջին հերթին տեղեկության զտման և արգելափակման մասին է:

Այդ միջոցների կիրառման արդյունքներից և մակարդակից ելնելով՝ երկրները դասակարգվում են երեք խմբի՝ ազատ, մասնակիորեն ազատ և ոչ ազատ:
Ազատ խմբի մեջ են մտնում Ուկրաինան, Վրաստանը, Արգենտինան, Իտալիան, Հունգարիան, Գերմանիան և ԱՄՆ-ը:

Մասնակիորեն ազատ են Ղազախստանը, Ռուսաստանը, Հնդկաստանը, Ադրբեջանը, իսկ ոչ ազատ՝ Բելառուսը, Ուզբեկստանը, Իրանը, Կուբան, Չինաստանը, Վիետնամը:

Վրաստանը և Թունիսը նախորդ տարվա համեմատությամբ արձանագրել են ամենամեծ աճը խոսքի ազատության մեջ: Խոսքի ազատության ամենամեծ անկումը գրանցվել է Բահրեյնում, Պակիստանում, Եթովպիայում և Եգիպտոսում:

Կազմակերպությունը նաև սահմանել է այն երկրները, որոնք այժմ կանգնած են առաջիկա 12 ամիսների ընթացքում խոսքի ազատության սահմանափակումների վտանգի առջև: Դրանք են Ադրբեջանը, Լիբիան, Մալայզիան, Պակիստանը, Ռուսաստանը և Շրի-Լանկան: