Financial Times. Կտուժի՞ արդյոք Սաակաշվիլիի հեղինակությունը

Financial Times-ը գրում է Վրաստանում չհանդարտվող սկանդալի մասին՝ կապված թբիլիսյան բանտում կալանավորների նկատմամբ խոշտանգումների և բռնության տեսագրությունների հայտնվելու հետ։

Ինչպես գրում է թերթը, երբ այս տեսագրությունները ցուցադրվեցին ընդդիմադիր հեռուստաընկերությունների եթերից, երկրի քաղաքական դաշտը ընտրություններից ընդամենը մի քանի օր առաջ ցնցում ապրեց. Տասնյակ հազար մարդիկ դուրս էին եկել բողոքի ակցիաների, իսկ Միխայիլ Սաակաշվիլիի կառավարությունը փորձում է որևէ կերպ հաղթահարել այս ճգնաժամը։

Սաակաշվիլիի կառավարթյունը վստահ է, որ հենց ընդդիմությունն է կանգնած այս տեսագրությունների հետևում։ Վերջինս էլ հերքում է մեղադրանքը։ Բռնությունների կադրերը բուռն արձագանք առաջացրին ոչ այնքան իրենց սարսափելի պարունակությամբ, որքան այն պատճառով, որ դրանց միջոցով կարելի է որոշակի հետևություններ անել Սաակաշվիլիի կառավարության մասին։ Թերթը նաև գրում է, որ վրացական ընդդիմությունը նաև մատնանշում է Թբիլիսիում կամրջի կառուցումը, որի արժեքը իբր հավասար է Վրաստանի գյուղատնտեսության նախարարության տարեկան բյուջեին։

Սաակաշվիլիի կուսակցության ներկայացուցիչ Չիորի Տակտակիշվիլին FT-ի հետ զրույցում նշել է, որ իրենց կուսակցությունը խիստ մտահոգված է այն հանգամանքով, որ Վրաստանում օտարերկրյա ներդրումների և ֆինանսական օգնության տեսքով ստացվող միլիարդները դեռ չեն հասել Վրաստանի բոլոր ընտանիքներին։ Սակայն, ինչպես գրում է FT-ը, մինչ ԵՄ-ն և ԱՄՆ-ն աջակցում են Վրաստանին և վերջին 4 տարվա ընթացքում օգնություն են տրամադրել 8 միլիարդ դոլարի չափով, նրանք պակաս առատաձեռն կլինեն, եթե վրացական կառավարության՝ քաղաքացիական ազատություններին և մարդու իրավունքների պաշտպանության ձգտումը հայտնվի վտանգի տակ։