Times. Չինաստանը դարձել է էլ ավելի հզոր տերություն

Համաշխարհային Մամուլ 26 Սեպտեմբեր, 2012 10:56

Times-ը գրում է, որ Չինաստանի աճող տնտեսական հզորության և վերջինիս՝ խաղաղասեր արտաքին քաղաքականության մասին հայտարարությունների միջև զգալի հակասություններ են առաջանում։ Չինաստանի տնտեսությունը արագ վերելք է ապրում 1978 թվականից։ Այսօր իր հզորությամբ աշխարհում երկրորդ խոշորագույն տնտեսությունը դառնում է ավելի վստահ նաև անվտանգության հարցում։ Սա մասամբ բացատրվում է նրանով, որ միջազգային հանրությունը գնալով ավելի բազմաբևեռ է դառնում։ Բայց դա նաև երկրի ղեկավարության գիտակցված ընտրությունն է. գրում է թերթը։

Պեկինը, ըստ Times-ի, ամրապնդում է իր զինված ուժերը, մասնավորապես՝ նավատորմը։ Սա սպառնալիք չէ Արևմուտքի համար։ Սակայն, սա նշանակում է, որ ԱՄՆ-ը և նրա դաշնակիցները պետք է պահպանեն սերտ կապերը Ասիայի հետ:

Չինաստանի աճող ռազմական հզորության ամենատեսանելի խորհրդանիշը Պեկինի կողմից իր առաջին ավիակրի ձեռքբերումն է։ «Այո՛, Liaoning-ը վերասարքավորված հին սովետական նավ է, նրա վրա չկան ինքնաթիռներ, բայց այս ձեռքբերումը դատարկ ժեստ չէ»,-ընդգծում է Times-ը։

Ավիակիրը տարածաշրջանային հզորության խորհրդանիշ է։ Դա նաև ցույց է տալիս, որ Պեկինում առաջնորդների նոր սերնդի իշխանության գալուց ընդամենը մի քանի շաբաթ առաջ երկրի ղեկավարությունը կանխատեսում է, որ ապագայում Չինաստանը ստիպված է ապավինել իր ռազմական հզորությանը նաև տարածաշրջանից դուրս։

Վերջին 15 տարվա ընթացքում Չինաստանի առևտրային շահերն ընդգրկել են աշխարհի գրեթե բոլոր երկրները, ինչն իր հերթին հանգեցրել է չինական սփյուռքի աճին։ Ճգնաժամի իրավիճակում նրանց պետք է տուն վերադարձնել: Լիբիայում հակամարտության ընթացքում երկրից տարհանվել է Չինաստանի 35,000 քաղաքացի։ Այս նպատակով Պեկինն արտոնագրել էր ինքնաթիռներ և հունական նավեր։ Հաշվի առնելով չինական զգալի ներդրումները՝ այնպիսի երկրներում, ինչպիսիք են Զամբիան, Կոնգոն ու Չադը, շատ հեշտ է հասկանալ, որ Պեկինը կցանկանար հնարավորություն ունենալ պաշտպանել քաղաքացիներին:

Չինաստանի տնտեսական զարգացման հետագա գործընթացը համընկնում է ռազմական հզորության զարգացման հետ։ Սա չի նշանակում, որ Չինաստանը կարող է դառնալ ԱՄՆ-ի լուրջ մրցակիցը խաղաղօվկիանոսյան տարածաշրջանում կամ այլուր։ Սակայն, որպեսզի վստահանա, որ Չինաստանի աճող ռազմական հզորությունը վտանգ չի ներկայացնում, ԱՄՆ-ը պետք է հստակ հասկանա, որ իրենք հավատարիմ են մնում դաշնակիցներին, հավաքական անվտանգության սկզբունքներին և ազատական միջազգային կարգին. զգուշացնում է Times-ը: