Financial Times. Սաակաշվիլիի ընտրությունը

Այսօր Financial Times-ը խմբագրական հոդված է հրապարակել «Սաակաշվիլիի ընտրությունը» խորագրով։ Ըստ թերթի՝ Վրաստանում 2003-ին նրա   իշխանության գալուց ի վեր Սաակաշվիլին վայելում էր Արևմուտքի հավանությունը՝ մեծ մասամբ արժանի։

Տարածաշրջանում, որը լի է կոռումպացված և ավտորիտար կառավարություններով, նա որոշել է գնալ այլ ճանապարհով՝ փորձելով մինչ այդ անգործունակ երկրում հաստատել ժամանակակից եվրոպական ժողովրդավարություն։ Փոփոխությունների արագությունն այնպիսին էր, որ Վրաստանի նախագահ Միխայիլ Սաակաշվիլին նույնիսկ երազում է, որ իր երկիրը կարող է անդամակցել ԵՄ-ին և ՆԱՏՕ-ին:

Սակայն խորհրդարանական ընտրությունների նախօրեին լուսապսակը Սաակաշվիլիի գլխավերևում մի փոքր խամրեց այն տեսահոլովակի հանրայնացման ժամանակ, որում թբիլիսյան բանտի աշխատակիցները խոշտանգումների են ենթարկում բանտարկյալներին։ Այդ քայլը հաշվարկված էր մաքսիմալ արդյունավետությամբ։ Սաակաշվիլին հեռացրեց երկու նախարարների, բանտի աշխատակիցներից շատերը ձերբակալվեցին, նա նաև խոստանում է այս սկանդալի մանրակրկիտ հետաքննություն։ Սակայն բողոքի ցույցերը շարունակվում են. գրում է Ft-ը։ Սա մասամբ պայմանավորված է այն հանգամանքով, որ շատերը վաղուց անհանգստացած են Վրաստանի դատական և քրեակատարողական համակարգերով. գրում է Financial Times-ը: «Վարդերի հեղափոխությունից» ի վեր այս համակարգը շատ կոշտ է եղել։ Մեղադրյալների գրեթե 100%-ը մեղավոր է ճանաչվում։ Մեկ շնչի հաշվով բանտարկյալների թիվն այս երկրում աշխարհում ամենաբարձրերից է:

Ժամանակին դա բացատրվում էր  հանցավորության դեմ կազմակերպված պայքարի անհրաժեշտությամբ։ Սակայն այժմ քննադատների պնդմամբ նույն միջոցներն օգտագործվում են ընդդիմության դեմ։

Ինչևէ, թերթը շարունակում է, թեև նախագահը հերքում է այս մեղադրանքները, նա պետք է անի ամեն ինչ, որպեսզի նման բան այլևս տեղի չունենա։ Անհրաժեշտ է անցկացնել բանտային սկանդալի մանրակրկիտ հետաքննություն, ինչպես նաև բարեփոխումներ իրականացնել իրավական համակարգում։ Շատ ավելի կարևոր է ապահովել ազատ և արդար ընտրությունների անցկացումը։