The Washington Post. Պետք է կանխենք Իրանի՝ միջուկային զենքի ձեռքբերումը

Իսրայելի վարչապետ Բենիամին Նեթանյահուն քիչ առաջ ՄԱԿ-ի Գլխավոր ասամբլեայում հանդես եկավ ելույթով՝ կտրուկ քննադատելով Իրանի միջուկային ագրեսիվ քաղաքականությունը:

«Երեք հազար տարի առաջ Դավիթ թագավորը իշխում էր Երուսաղեմում: Սա ասում եմ հատուկ նրանց համար, ովքեր պնդում են՝ Իսրայելը պատմական արմատներ չունի այս տարածքում: Ես հայտարարում եմ, որ Իսրայել պետությունը դեռ ապրում է և կապրի ընդմիշտ:

Իսրայելը ցանկանում է տեսնել Մերձավոր Արևելքը որպես խաղաղ տարածաշրջան, իսկ տարածաշրջանի երեք կրոնները՝ քրիստոնեությունը, մահմեդականությունը և հուդայականությունը, պետք է գոյակցեն խաղաղ և փոխադարձ համաձայնության պայմաններում:

Չենք ընդունում Պաղեստինի միակողմանի անկախության հռչակումը: Պետք է նստենք բանակցությունների սեղանի շուրջ, հասնենք համաձայնության՝ փոխզիջման ճանապարհով»:

Անդրադառնալով Իրանին՝ նա հանգամանալից ներկայացրեց իր մեղադրանքների իրողությունը, անհանգստություն արտահայտեց այն առումով, որ Իրանի միջուկային ծրագիրը դեռևս չի կանխվել. «Եթե ուզում եք հասկանալ՝ ինչ կլինի, եթե Իրանը ձեռք բերի միջուկային զենք, ապա պատկերացրեք, թե ինչ կլինի, եթե ալ-Քաիդան միջուկային զենք ձեռք բերի: Նույնն է. մի կողմից ահաբեկչական կազմակերպություն է, մյուս կողմից՝ ահաբեկչական վարչակարգ: Պարզապես պատկերացրեք Իրանի հարձակումը միջուկային զենքով:

Ես 15 տարի է, ինչ խոսում եմ Իրանի միջուկային զարգացման ծրագրի կանխման անհրաժեշտության մասին: Դիվանագիտությունը և 7 տարի կիրառվող պատժամիջոցները փաստորեն չեն օգնում. դրանք չեն կասեցրել այդ ծրագիրը: Միայն մեկ ելք կա՝ խաղաղ կերպով թույլ չտալ Իրանին ձեռք բերել միջուկային զենք: Եվ դա Իրանի միջուկային զարգացման ծրագրի վրա հստակ «կարմիր գիծ» քաշելն է, որպեսզի կանխենք նրա կողմից միջուկային զենքի ձեռք բերումը»: