Daily Telegraph .Սիրիայի հարցում Ռուսաստանի հետ համաձայնության գալ կօգնի ՆԱՏՕ-ն

Daily Telegraph-ը հրապարակել է Մեծ Բրիտանիայի արտաքին գործերի նախկին նախարարի հոդվածը, որը նվիրված է Սիրիայի ճգնաժամի լուծման հնարավոր ուղիներին։ «Վտանգավոր է կարծել, որ քաղաքացիական պատերազմները կարող են ավարտվել, երբ բոլոր կողմերը կսպառեն իրենց ուժերը»,-ասում է Օուենը հոդվածի սկզբում։ Ըստ հոդվածագրի՝ ժամանակն է, որպեսզի ԱՄՆ-ն, Բրիտանիան և Ֆրանսիան դադարեն քննադատել Ռուսաստանին և Չինաստանին, որ Սիրիայի հարցով նրանք հրաժարվում են համագործակցել ՄԱԿ-ի Անվտանգության խորհրդի շրջանակներում։

Անհրաժեշտ է հասկանալ, թե որքան է Ռուսաստանի ղեկավարությունը վստահ, որ նա պարզապես խաբվել է, երբ չի կիրառել վետո Լիբիայի հարցով անվտանգության խորհրդի բանաձևի դեմ, որը հաստատեց Լիբիայում լիբիական օդանավերի թռիչքներից ազատ գոտու ստեղծումը։ Նրանք վստահ են, որ ՆԱՏՕ-ն գործիք է դարձել իշխանափոխության համար։ Արդյունքում նրանք վետո կկիրառեն Սիրիայի հետ կապված ցանկացած բանաձևի վրա։

Ըստ Օունեի՝ նա առաջիններից մեկն էր, ով կոչ արեց Լիբիայում թռիչնքներից ազատ գոտի հաստատել։ ՆԱՏՕ-ին հաջողվել է ժամանակին կանխել զանգվածային ջարդերը Բենղազիյում, ՆԱՏՕ-ի ուժերի հրամանատարությունը ծանրակշիռ փաստարկներ ուներ հօգուտ իրենց մանդատի ընդլայնման անհրաժեշտության:

Այժմ, երբ խոսքը վերաբերում է Սիրիային, անհրաժեշտ է իրականացնել ռացիոնալ բանակցություններ, հատկապես՝ Ռուսաստանի հետ: Արևմտյան զինվորականները կարող էին համոզել նրան, որ այս դեպքում մանդատի ընդլայնման մասին խոսք անգամ չի կարող լինել։

Սիրիային անհապաղ պետք է երկու բան՝ ՄԱԿ-ի հատուկ դեսպանորդի հովանու ներքո անցումային շրջանի մասին համաձայնագիր՝ պարտադիր զինադադարի պայմանով, ինչպես նաև այն ուժը, որ կարող է պատժել համաձայնագրի խախտողներին։ Գործնականում  ՆԱՏՕ-ն միակ կազմակերպությունն է, որին Անվտանգության խորհուրդը կարող է դիմել Սիրիայում թռիչքներից ազատ գոտու ստեղծման խնդրանքով։

Լորդ Օուենն առաջարկում է ՄԱԿ-ի գլխավոր քարտուղարին դիմել ՆԱՏՕ-ի գլխավոր քարտուղարին, որպեսզի նա փոխանցի Սիրիայի հարցը ՆԱՏՕ-Ռուսաստան խորհրդին։ Ինչպես նշում է հոդվածագիրը, այս ֆորումը մինչ այժմ շատ քիչ է օգտագործվել։ Նրա շրջանակներում զինվորականները և դիվանագետները կարող էին համաձայնության գալ։