Die Welt. Oբաման արգելել է չինական հողմաղացների կառուցումը

Համաշխարհային Մամուլ 29 Սեպտեմբեր, 2012 15:10

Ամերիկա-չինական լարված տնտեսական հարաբերությունները կարող են ավելի վատթարանալ. գրում է թերթը։ ԱՄՆ-ի նախագահ Բարաք Օբաման արգելել է չինական ձեռնարկատերերի կողմից իր տարածքում հողմաղացների համալիրի կառուցումը, պատճառաբանելով, որ դրանք սպառնում են պետական անվտանգությանը։

Չինական Ralls ընկերությունը ցանկանում էր ԱՄՆ-ի Օրեգոն նահանգում 4 հողմաղացային համալիր գնել։ Սակայն նախագահ Օբաման արգելել է դրանց վաճառքը չինական ընկերությանը դրանց՝ ամերիկյան ռազմաբազային մոտ գտնվելու պատճառաբանությամբ։

«Կան հավաստի ապացույցներ, որ Ralls ընկերությունը և նախագծին մասնակից մյուս բաժնետերերը կարող են քայլեր ձեռնարկել, որոնք կարող են սպառնալ ԱՄՆ-ի ազգային անվտանգությանը»,-հնչել է ուրբաթ օրը նախագահի քարտուղարության հրապարակած հայտարարության մեջ։

Օբամայի կարգադրությանն է հետևել ԱՄՆ-ում Արտասահմանյան ներդնողների կոմիտեն համանման մի հանձնարարականով։

Ralls-ը հիմա 90 օր ժամկետ ունի Օրեգոնում իր բաժնեմասերը վաճառելու համար։ Վերջինս որոշել է այդ որոշումը դատական կարգով բողոքարկել։

22 տարվա ընթացքում սա առաջին դեպքն է, երբ ԱՄՆ-ի նախագահը արգելել է տեղական ձեռնարկության վաճառքը արտասահմանցիներին։ 1990թ. նախկին նախագահ Ջորջ Բուշը նույնպես արգելեց ամերիկյան ընկերություններից մեկի վաճառքը Չինաստանին։

Վաշինգտոնում Ֆինանսների նախարարությունն ուղղակիորեն նշել է, որ որոշման նախադեպը չի անդրադառնալու չինական և արտասահմանյան այլ ներդրողների գործունեության վրա։