Reuters. Վրաստանի իշխող կուսակցությունը հաղթում է ընտրություններում

Չնայած Վրաստանի տեղական մամուլը, հիմնվելով արդեն հանրահայտ հարցումների տվյալներին (exit polls), պնդում է,  որ հաղթում է ընդդիմությունը, արտասահմանյան լրատվական գործակալությունները, մասնավորապես Reuters-ը և Euronews-ը, կարծես Սաակաշվիլիի հետ ձեռք ձեռքի տված, պնդում են, որ հաղթում է իշխող կուսակցությունը: Թե ինչ է գրում Reuters-ը, կարդացեք ստորև։

Վրաստանի նախագահ Միխեիլ Սաակաշվիլիի իշխող կուսակցությունը հաղթանակ է տոնում ընդդիմության «Վրաստանի երազանք» կոալիցիայի նկատմամբ խորհրդարանական ընտրություններում, չնայած հարցումները (exit polls) լրիվ հակառակն էին ցույց տալիս, այն է՝ պայքարն ընթանում է հավասար պայմաններում:

Հարցումները կանխագուշակում էին` միլիարդատեր Բիձինա Իվանիշվիլիի «Վրաստանի երազանք»-ը կհաղթի՝ ստանալով ընտրողների կեսից ավելիի ձայները, և 150-ից կունենա 77 տեղ նախկին Սովետական Հանրապետության խորհրդարանում:

Բայց Սաակաշվիլիի «Միացյալ ազգային շարժում»-ը նշում էր, որ հավատում է իր հաղթանակին, այսինքն՝ իշխանությանը կրկին հասնելու ճանապարհին է:

Հիշեցնենք, որ այսօր անցկացված ընտրությունները, որի ժամանակ չորս տարի ժամկետով ընտրվելու են 150 ժողովրդական պատգամավորներ, մեծ հետաքրքրություն է առաջացնում, քանի որ հաջորդ տարի՝ նախագահական ընտրություններից հետո, երկրում փոխվելու է հասարակական-քաղաքական կառուցվածքը, որի դեպքում նախագահը և խորհրդարանը, հատկապես վարչապետը, կստանան զգալի լայն լիազորություններ:

Նկատենք, որ ԿԸՀ-ն դեռևս չի հրապարակել որևէ պաշտոնական տվյալ: