Financial Times. Google-ն առաջ է անցնում Microsoft-ից

Financial Times պարբերականը մեծ նշանակություն է տալիս այն հաղորդագրությանը, որ առաջին անգամ Google կորպորացիայի կապիտալացումը կգերազանցի Microsoft կորպորացիայի արժեքը։ Խոսքը ընկերության բաժնետոմսերի ընդհանուր արժեքի մասին է։
Այն կազմել է 249.2 մլրդ դոլար՝ 1 մլրդ-ով գերազանցելով Microsoft կորպորացիայի կապիտալացումը։ Ինչպես գրում է պարբերականը, այդ խորհրդանշական պահը ցույց է տալիս Google ընկերության գործնական ռազմավարության հաջողությունը։ Իսկ Google-ը շեշտը դնում է համացանցային հաղորդակցության միջոցների, ոչ թե ծրագրային ապահովվածության զարգացման վրա։

Շուկան նաև արձագանքում է Microsoft ընկերության Windows 8 օպերացիոն համակարգի մոտալուտ գործարկման վերաբերյալ ներդրողների կասկածներին։

Սովորաբար մասնավոր օգտատերերը չեն շտապում փոխել այն օպերացիոն համակարգը, որով աշխատում են, ինչը բերում է Microsoft ընկերության բաժնետոմսերի գների անկմանը։ Իսկ դրա հետևանքով Google-ը և Apple-ը սրընթաց մոտենում են Microsoft-ին։
Թվում է՝ Microsoft-ի համար մայրամուտ է սկսվել։