Die Presse. Ասադին դե՞մ, թե՞ կողմ. Սիրիայի հակամարտությունը պառակտում է քրդերին

Սիրիական վարչակարգը ցանկանում է քրդական զինված ուժերն օգտագործել պատերազմի առաջին գծում, ուստի Անկարան Սիրիայի հակամարտության մեջ իր համար նոր դաշնակից է տեսնում՝ ի դեմս Հյուսիսային Իրաքի քրդերի առաջնորդ Բարզանիի. գրում է ավստրիական թերթը:

Թուրքական ընդդիմությունն այդ կապակցությամբ բավականին սուր դժգոհություն է հայտնել: Թուրքիայի Ազգայնական կուսակցությունը երկուշաբթի օրը վարչապետ Էրդողանին մեղադրել է «հակահայրենասիրական պահվածքի» մեջ: Կառավարության ղեկավարը շաբաթվա վերջում կայացած իր «Արդարություն և զարգացում» կուսակցության հանրագումարին հրավիրել էր նաև Մասուդ Բարզանիին՝ հյուսիսիրաքյան Քուրդիստանի ղեկավարին: Դեռևս մի քանի տարի առաջ Էրդողանը պատերազմով էր սպառնում Բարզանիին: Անկարան այն ժամանակ քրդական առաջնորդին մեղադրում էր ընդհատակյա «Քրդական աշխատավորական կուսակցության» անջատողական գրոհայինների՝ Թուրքիայի տարածք անարգել ներխուժելու մեջ:

Սակայն ժամանակները փոխվեցին: Այսօր Բարզանին Էրդողանի կարևոր դաշնակիցներից է Իրաք-Թուրքիա-Սիրիա սահմանային տարածքների հարցում: Բարզանիին հաջողվեց համոզել Թուրքիային, որ Իրաքի հյուսիսում գտնվող քրդերը անվտանգ են Թուրքիայի համար: Բարզանին խոստացել է Էրդողանին գործի դնել իր ազդեցությունը «Քրդական աշխատավորական կուսակցության» գրոհայինների վրա: Այժմ նոր ճակատ է բացվել, որտեղ Էդողանն ու Բարզանին որպես դաշնակիցներ են հանդես գալիս: Դա սիրիական հակամարտությունն է, որը բաժանել է քրդերին ապստամբների և կառավարության կողմնակիցների միջև:

Քուրդ գրոհայինները վերջին շրջանում ակտիվացրել էին իրենց գործունեությունը Թուրքիայում: Անկարան արդեն մատնանշել է դրա մեղավորներին, այն է՝ սիրիական վարչակարգը: Թուրքիան Սիրիայի կառավարությունը քննադատող երկրներից է: Թուրքական կառավարությունը պաշտպանում է սիրիացի ապստամբներին և միջազգային ճնշում գործադրում Բաշար ալ Ասադի վարչակարգի վրա: Այժմ Անկարան մեղադրում է Բաշար ալ Ասադին քուրդ գրոհայիններին Թուրքիայի դեմ պայքարի հանելու մեջ:

Այսօր Բարզանին փորձում է մեկ միասնական ճանապարհով տանել քրդական զանգվածները: Հյուսիսային Իրաքում նրան հաջողվել է այդ փորձը: Սակայն Ասադի վարչակարգի դեմ պայքարողների և նրա կողմնակիցների միջև բաժանված քրդական զանգվածների միջև լարվածությունը չի թուլացել: Այնուամենայնիվ Բարզանին այն քաղաքական գործիչն է, ով ամենամեծ ազդեցությունն ունի Սիրիայի քրդերի վրա: Դա արդեն իսկ բավարար պատճառ է Էրդողանի համար՝ հրավիրելու նրան իր կուսակցության համագումարին: