The Huffington Post. Հայկական կառավարությունը սպառնում է նախկին արտգործնախարար Վարդան Օսկանյանին

Հայաստանի արտաքին գործերի նախարարին սպառնում են, որ կդադարեցվի երկրի ամենագործունյա և նորարական ոչ առևտրային կազմակերպություններից մեկի գործունեությունը։
ԱՄՆ-ում կրթություն ստացած Վարդան Օսկանյանը, ով 1998-2008 թվականներին զբաղեցրել է Հայաստանի Հանրապետության արտաքին գործերի նախարարի պաշտոնը, հայկական կառավարության կողմից մեղադրվում է ԱՄՆ նախագահի նախկին թեկնածու Ջոն Հանթսման կրտսերի հորից ստացված՝ նվիրատվության համար նախատեսված փողերի լվացման մեջ։

Արտաքին գործերի նախարարի պաշտոնը թողնելուց հետո Օսկանյանը 2008 թվականին հիմնադրել է Civilitas հիմնադրամը Հայաստանում քաղաքացիական հասարակության զարգացման համար։ Ստեղծումից ի վեր հիմնադրամը ֆինանսավորվել է որոշ արևմտյան կառավարությունների, ինչպես նաև՝ ԵԱՀԿ, մի շարք ոչ կառավարական միջազգային կազմակերպությունների և անհատ դոնորների կողմից։ Ջոն Հանթսման Ավագն այդ դոնորներից մեկն էր։

Երեքշաբթի օրը ՀՀ Ազգային ժողովում կկայանա քվեարկություն Օսկանյանին խորհրդարանական անձեռնմխելիությունից զրկելու հարցով՝ նպատակ ունենալով մեղադրել նրան դրամական միջոցների յուրացման և փողերի լվացման մեջ։ Մեղավոր ճանաչվելու դեպքում Օսկանյանին սպառնում է 12 տարվա ազատազրկում։ Անկախ Օսկանյանին անձեռնմխելիությունից զրկելուց և անկախ նրա դատապարտումից՝ հայկական կառավարությունը կարող է ցանկացած ժամանակ սառեցնել Civilitas-ի բանկային հաշիվը՝ դադարեցնելով հիմնադրամի աշխատանքը, աշխատանքից զրկելով շուրջ 60 մարդու և վերջ դնելով երկրում սկիզբ առած զարգացման բազմաթիվ հաջող նախագծերի։