Financial Times. «Վրացական երազանքը» իրականություն դարձավ

Financial Times պարբերականում տեղ է գտել «Ժողովրդավարական փոփոխություններ» վերնագրով հոդվածը, որի հեղինակը մասնավորապես նշում է, որ ընդդիմության հաղթանակը խորհրդարանական ընտրություններում կարող է հանգեցնել այս երկրի հետ հարաբերությունների վերանայմանը ինչպես Մոսկվայում, այնպես էլ՝ Վաշինգտոնում։

Վերլուծելով Բիձինա Իվանիշվիլիի առաջին խոսքերը՝ Financial Times–ը հետևյալ հարցադրումն է կատարում. նա  կկարողանա՞ արդյոք վերականգնել հարաբերությունները Ռուսաստանի հետ՝ միաժամանակ ամրապնդելով իր հարաբերություններն ԱՄՆ-ի հետ։ Ըստ Իվանիշվիլիի՝ Վրաստանը կշարունակի ձգտել անդամակցել Եվրոպական միությանն ու ՆԱՏՕ-ին, չնայած որ հենց Թբիլիսիի՝  ՆԱՏՕ-ին անդամակցելու ձգտումն էր 2008 թվականի ռուս-վրացական հակամարտության իրական պատճառը. գրում է Financial Times-ը:

Դատելով Իվանիշվիլիի հայտարարություններից՝ նա այս հարցում որևէ հակասություն չի տեսնում։ Վրաստանի անդամակցությունը ՆԱՏՕ-ին Մոսկվայի համար լուրջ խնդիր չի ներկայացնում. «Եթե մենք վարենք ճիշտ քաղաքականություն, մենք կարող ենք համոզել Ռուսաստանին, որ Վրաստանի անդամակցությունը ՆԱՏՕ-ին նրա համար որևէ սպառնալիք չի ներկայացնում»,-ասել է Իվանիշվիլին։

Առանձին խմբագրականում The Financial Times-ը Վրաստանում կայացած ընտրությունների վերաբերյալ գրում է, որ դրանք շրջադարձային էին երկրի պատմության մեջ։ Հոդվածում Սաակաշվիլիին արժանին է մատուցվում՝ ընդդիմության հաղթանակը ճանաչելու համար՝ դրանով իսկ ճանապարհ հարթելով երկրի վերջին 20 տարվա պատմության մեջ առաջին անգամ խաղաղ ճանապարհով իշխանության փոխանցման համար։
Չնայած կառավարման ավտորիտար ձևերին՝ Սաակաշվիլիին հաջողվեց իրականացնել երկրում ժողովրդավարական փոփոխություններ. ընդգծում է թերթը։