The Guardian. Ռուսաստանը հերքում է ԱՄՆ-ում ձերբակալված քաղաքացիների կապը ռուսական հետախուզության հետ

Ղազախստանում ծնված ԱՄՆ քաղաքացին և ևս վեց մարդ դատարանի առաջ են կանգնել հինգշաբթի՝ ռուսական հատուկ ծառայությունների համար անօրինական ճանապարհով ռազմական տեխնոլոգիաների արտահանման մեղադրանքով։ Նրանք դատարանի դահլիճ կվերադառնան ուրբաթ, երբ հավանաբար որոշում կընդունվի գրավի դիմաց նրանց ազատ արձակելու մասին, մինչև գործի հնարավոր քննությունը։

Մոսկվան հերքում է, որ որևէ կապ ունի գործակալների ենթադրյալ «ցանցի» հետ, որի մասին տեղեկությունները հրապարակվել էին չորեքշաբթի ամերիկյան իշխանությունների կողմից:

ՌԴ ԱԳՆ-ը զարմանք է հայտնել ամերիկյան կողմի հայտարարությունների վերաբերյալ։

«Առաջ քաշված մեղադրանքները վերաբերում են ՌԴ մի քանի քաղաքացիների։ Մեղադրանքները քրեական բնույթ են կրում և չեն վերաբերում հետախուզական գործունեությանը»,-ռուսական ԶԼՄ-ներին հայտնել է ՌԴ ԱԳՆ փոխնախարար Սերգեյ Ռյաբկովը։

Իրավիճակն անհանգստություն է առաջացրել Ռուսաստանում, որի հարաբերությունները սառը պատերազմից ի վեր իր թշնամու հետ դեռ բարդ բնույթ են կրում։

Իշխանությունները հարցաքննում են ռուսներին, որոնք մեղադրյալների շարքում են գտնվում։

ԱԳՆ պաշտոնական ներկայացուցիչ Ալեքսանդր Լուկաշևիչի խոսքերով`Վաշինգտոնը տեղեկացրել է Մոսկվային, որ մեղադրանքները քրեական բնույթ են կրում և կապ չունեն լրտեսության հետ։

Ըստ մեղադրանքների՝ 2008 թվականի հոկտեմբերից 46-ամյա Ֆիշենկոն և նրա գործընկերները ներգրավված են եղել «գաղտնի և համակարգային դավադրության մեջ»՝ ԱՄՆ-ում զգուշորեն պահպանվող գաղտնի տեխնոլոգիաները ձեռք բերելու և դրանք Ռուսաստան փոխադրելու նպատակով։

Հանրապետական թեկնածու Միթ Ռոմնին մեղադրել է Օբամային Մոսկվայի նկատմամբ ավելորդ մեղմության մեջ՝ անվանելով Ռուսաստանին «ԱՄՆ-ի առաջին աշխարհաքաղաքական թշնամի»։

Հիշեցնենք, որ այս լրտեսական գործում նաև հայազգի կին է ներգրավված եղել։