Ծնողները երեխային գցել են լվացքի մեքենան, մյուսը նետել է գետը, խաղալիք ափսեի մեջ կղանք լցրել, ստիպել, որ ուտի

Այսօր խորհրդարանում 2021 թվականի պետական բյուջեի կատարողականի քննարկման ժամանակ ՀՀ ԱԺ ՔՊ խմբակցության պատգամավոր Լենա Նազարյանը, դիմելով զեկուցող Աշխատանքի ու սոցիալական հարցերի նախարար Նարեկ Մկրտչյանին, հիշեցրեց Գլխավոր դատախազության հաղորդագրությունն այն մասին, որ Հայաստանում վերջին տարների երեխաների նկատմամբ կատարված հանցագործությունների դեպքերն աճում են։

Նազարյանի խոսքերով, ցավալիորեն կա վիճակագրություն, որ երեխաների նկատմամբ կատարված հանցագործությունների շուրջ 40 տոկոսն, ըստ դատախազության, կատարվել են նրանց կողմից, ովքեր պարտավոր են պաշտպանել երեխաներին․ «Կներեք, ես ուզում եմ կոնկրետ օրինակներ հիշեցնել։

Օրինակ Դեբետ գետը նետված երկու տարեկան երեխայի դեպքը։ Կամ մանկապարտեզում դայակների դրդմամբ և երեխաների միջոցով մյուս երեխայի նկատմամբ բռնության դեպքը, երբ երեխաները նստել են երեխայի մեջքին, քշել ձիու պես, թքել ականջի մեջ, վզին պարան կապել, խաղալիք ափսեի մեջ կղանք լցրել, ստիպել, որ ուտի։

Մի ուրիշ դեպք կա, երբ մոր, խորթ հոր ու խորթ տատու կողմից 1,5 տարեկան երեխա է փաստացի սպանվել։ Գիշերները երեխային թողել են լվացքի մեքենայի մեջ, ոստիկաններն ու քննիչներն արյունոտ անկողին են գտել այն ընտանիքի տանը, իսկ համայնքի ղեկավարը հայտնել է, որ տեղյակ չէ, քանի որ որևէ մեկի անձնական ընտանիք քիթը չի խոթում։ Այսպիսի դեպքեր են արձանագրվել Հայաստանում, ակնհայտ է, որ շատ լուրջ խնիդրներ ունենք այս ոլորտում»։

Նազարյանը ցանկացավ իմանալ՝ դեպքե՞րն են շատացել, թե՝ հաղորդումները․ «Ի՞նչ նոր մեխանիզմներ են մշակվելու երեխաների պաշտպանությունն ավելի արդյունավետ, ավելի ճիշտ կազմակերպելու համար»։

Մկրտչյանը հայտարարեց, որ պետք է անընդհատ խոսել երեխաների պաշտպանության անհրաժեշտության մասին, անընդհատ իրազեկել․ «Իրականում շատ ցավալի դեպքերի մասին եք խոսում։ Դրանց մի մասին տեղյակ ենք։ Մենք իրավապահ մարմինների հետ քննարկման արդյունքում պետք է պարզենք՝ դեպքերն են շատացել, թե հաղորդումները։

Բայց երբ միասնական սոցիալական ծառաւյությունը համայնքներում դարձնենք կենդանի աշխատող օրգանիզմ, նմանատիպ հարցերը կանխարգելելու հնարավորություն կունենանք։ Շատ խնդիրներ գալիս են հենց սոցիալական վիճակից, խնդիրներից։ Այդ կառույցները, համայնքները, սոցիալական աշխատողները պետք է շատ սերտ աշխատեն։

Մենք պետք է միջգերատեսչական մոտեցում ունենանք, սա մեկ գերատեսչության խնդիր չէ»։

Նա կարևորեց նաև քաղաքացիների անտարբերության հաղթահարումը։