Տեսախցիկը նկարահանել է երկու արջերի կռիվը գոմում (տեսանյութ)

ԱՄՆ-ում երկու արջ կռիվ է սկսել կնոջ տանը, գրում է UPI-ն։ Թե ինչ չեն կիսել գազանները, այդպես էլ առեղծված է մնացել:

Կալիֆոռնիայից Լիզա Քուիքի խոսքով՝ գիշերն արթնացել է գոմից եկող ձայներից։ Սկզբում կինը կարծել է, թե գողերն են թափանցել, ուստի հեռախոսի միջոցով միացել է տեսախցիկին՝ իրավիճակը գնահատելու համար։ 

Պարզվել է, որ ամերիկուհու անդորրը խաթարել են երկու արջեր, որոնք կռիվ են սկսել նրա տարածքում։ Չիմանալով, թե ինչ անել նման իրավիճակներում, Լիզան սկսել է հեռվից բղավել գիշատիչների վրա՝ փորձելով վախեցնել նրանց. դրանում նրան օգնել են շները:

Պլանն աշխատեց. կենդանիները փախան։ Ինքը՝ Քուիքը, չգիտի, թե ինչն է գրավել կենդանիներին, սակայն, ըստ ամերիկուհու, այդ կողմերում արջերը բավականին հաճախ են դուրս գալիս անտառից։ Նա ենթադրում է, որ արջերը, հավանաբար, փորձում էին ուտելիք գտնել։