Շիրակի մարզում սուբվենցիոն ծրագրերով կիրականացվեն ասֆալտապատման և բարեկարգման աշխատանքներ

Հասարակություն 28 Հուլիս, 2022 10:55

Շիրակի մարզում 2022 թվականին սուբվենցիոն ծրագրերի շրջանակներում ավելի քան 14 կմ ասֆալտապատման և 4 կմ սալապատման աշխատանք է իրականացվելու: Կառուցվելու է 21 կմ ջրամատակարարման և 14 կմ ոռոգման համակարգ, տեղադրվելու է 409 լուսատու, իրականացվելու են գազաֆիկացման, նախակրթարանների ու մշակութային կառույցների նորոգման, բարեկարգման և այլ աշխատանքներ:

Ընդհանուր առմամբ, գումարային ամենամեծ հայտը Գյումրի համայնքի կողմից է ներկայացվել՝ շուրջ 3.3 մլդ դրամ: Այդ գումարի մեծ բաժինը տրամադրվելու է փողոցաշինությանը:

Ախուրյան համայնքի կողմից ներկայացվել է 8 ծրագիր՝ մանկապարտեզների, ոռոգման ցանցի նորոգումներ, փողոցաշինություն:

Արթիկում ևս իրականացվում են ասֆալտապատման, մշակույթի տների նորոգման, ոռոգման համակարգի կառուցման և փողոցային լուսավորության ցանցի անցկացման աշխատանքներ: Սրանց զուգահեռ՝ իրականացվում է վեց բազմաբնակարան շենքերի տանիքների նորոգում:

Անի համայնքի կողմից ներկայացվել է 7 ծրագրային հայտ, որից 2-ը՝ Իսահակյան և Շիրակավան բնակավայրերի մանկապարտեզները, համալիր փորձաքննություն չունենալու պատճառով, տեղափոխվել են հաջորդ տարի:

Եւս 6 ծրագիր էլ հաստատված է Աշոցքի համար՝ գազի ներքին ցանցի կառուցում, համայնքային կենտրոնների նորոգում, ասֆալտապատում, ջրագծի նորոգում և տեխնիկայի ձեռքբերում:

Ամենափոքր՝ 2 ծրագրային փաթեթով, ներկայացված է Ամասիա համայնքը՝ փողոցաշինության ու փողոցային լուսավորության:

Անցած տարի մեկնարակած որոշ աշխատանքեր տեղափոխվել են այս տարի:

«Գրեթե բոլոր համայնքների ծրագրերի մրցույթներն արդեն հայտարարվել են, ընտրվել են կապալառու կազմակերպությունները: Գյումրիում փուլ առ փուլ փողոցաշինական աշխատանքներն արդեն իրականացվում են»,-«Արմենպրես»-ին տեղեկացրեց Շիրակի մարզպետարանի Զարգացման ծրագրերի, զբոսաշրջության և վերլուծության բաժնի պետ Կարեն Բադիշյանը, հավելելով, որ պետության կողմից գերակա ճանաչված բոլոր ոլորտները ներառված են սուբվենցիոն ծրագրերում: Կարեն Բադիշյանը նաև տեղեկացրեց, որ կախված ծրագրերից՝ պետություն-համայնք հատկացվող գումարները տարբեր են:

Անդրադառնալով համայնքների կողմից ներկայացվող սուբվենցիոն ծրագրերի կարևորությանը՝ պատասխանատուն տեղեկացրեց, որ դրանք բոլորը պետք է լինեն հանրային լսումների արդյունքում ու բխեն տվյալ համայնքների զարգացման հնգամյա ծրագրերից: