Der Standard. Թուրքիան առգրավել է սիրիական ինքնաթիռի ուղեբեռը

Թուրքիան ազատ է արձակել Անկարայում հարկադիր վայրէջք կատարած սիրիական A-320 տիպի մարդատար ինքնաթիռը: Օդանավի ուղեբեռը, սակայն, առգրավվել է. հայտարարել է Թուքիայի ԱԳ նախարար Ահմեդ Դավութօղլուն չորեքշաբթի երեկոյան: ԶԼՄ-ները հայտնում են, որ ինքնաթիռում եղել է ռազմամթերք: Խոսքը գնում է հրթիռային և հաղորդակցման միջոցների համակարգի մասին:

Anadolu Ajansi գործակալության տվյալներով՝ Դավութօղլուն հայտարարել է, որ ինքնաթիռում հայտնաբերվել են «ոչ քաղաքացիական ուղեբեռին պատկանող» պարագաներ, որոնք փոխադրելու համար պետք է ներկայացվեր թույլտվության՝ ելնելով քաղաքացիական ավիաընկերության պահանջներից: Թե ինչ պարագաների մասին է խոսքը, ԱԳ նախարարը չի պարզաբանել: Սակայն վերջինս անուղղակիորեն մեղադրել է Ռուսաստանին սիրիական կառավարությանը զենք մատակարարելու և քաղաքացիական օդանավերի օգտագործումը չարաշահելու մեջ: Ինքնաթիռը մեկնարկել է թռիչքը Մոսկվայից՝ ուղևորվելով Դամասկոս:

«Մենք լի ենք վճռականությամբ՝ վերահսկել զենքի մատակարարումը մի ռեժիմի, որը դաժան սպանդ է իրականացնում իր քաղաքացիների նկատմամբ». հայտարարել է Դավութօղլուն Աթենք կատարած իր այցելության ժամանակ: Հետախուզական վարչության տվյալներով՝ «ոչ քաղաքացիական» բեռ է հայտնաբերվել ինքնաթիռի մեջ: Անընդունելի է, որ Թուրքիայի օդային տարածքն օգտագործվի զենք մատակարարելու համար: Այդ պատճառով ինքնաթիռի ուղեբեռը մասամբ առգրավվել է»:

Ինքնաթիռի 35 ուղևորների մեջ եղել են նաև ռուսներ, որոնց մասին Անկարայում կատարած հարկադիր վայրէջքից հետո հոգացել է ՌԴ դեսպանատունը: Մոսկվան Անկարայից բացատրություն է պահանջել կատարվածի համար:

Այս մասին հայտնում է Ալ Արաբիան: