Մարզիկը փորձել է ամուսնության առաջարկություն անել սիրելիին և ընկել է ջղաձգության պատճառով (տեսանյութ)

Էստոնիայի Տալլին քաղաքում անցկացված Ironman մրցույթի մասնակիցը որոշել է վերջնագծին ամուսնության առաջարկ անել իր սիրելիին, սակայն ջղաձգության պատճառով ընկել է։ Այս մասին հայտնում է Daily Star-ը։

Իսպանացի Քրիստիան Մորիատիելը նախատեսում էր մրցույթի ավարտից հետո ամուսնության առաջարկություն անել սիրելիին, սակայն ամեն ինչ ըստ պլանի չի ընթացել։ 40-ից 44 տարեկան մասնակիցների անվանակարգում տղամարդը զբաղեցրել է վեցերորդ տեղը։ Նա անցել է երթուղին ինը ու կես ժամում։

Վերջնագծում մարզիկը ծնկի է իջել իր սիրելիի առաջ և փորձել է նրան հանձնել մատանին, սակայն այդ պահին ջղաձգվել է, և սկսել է ցավից գլորվել գետնին։ Տղամարդուն օգնության են հասել միջոցառման մասնակիցները, որոնք սկսել են մերսել նրա ոտքերը։ Մորիատիելին օգնել են ծնկի գալ, և երկրորդ փորձի ժամանակ նա կարողացել է հարցնել կնոջը, թե արդյոք պատրաստ է ամուսնանալ իր հետ։ Նրա սիրելին դրական պատասխան է տվել ամբոխի բացականչությունների ներքո։

Միջադեպի ձայնագրությունը սոցցանցերում հրապարակվելուց հետո հարյուր հազարավոր դիտումներ է հավաքել։ Մեկնաբանություններում օգտատերերը սկսել են շնորհավորել զույգին, թեև նրանցից ոմանք կատարվածը վերևից նշան են համարել։ «Սա և՛ լավագույն, և՛ վատագույն հնարավոր առաջարկն էր»: — գրել է օգտատերերից մեկը։ «Երևի Աստված նրան նշան է տալիս և, ասես, ասում է. «Ոչ, կանգնիր»»,- կատակել է մեկ այլ մեկնաբան։