Die Welt. Pussy Riot-ի անդամ Տոլոկոննիկովան «Աստվածաշունչ» է կարդում

Pussy Riot խմբի անդամ, երկու տարվա ազատազրկման դատապարտված Նադեժդա Տոլոկոննիկովան գերմանական Musikexpress ամսագրին տված հարցազրույցում պատմել է իր ձերբակալության, Քրիստոս Ամենափրկչի տաճարում կատարած «պանկ աղոթքի» և ապագայի իր պլանների մասին:

Տոլոկոննիկովան հայտնում է, որ ուղղիչ աշխատանքային գաղութում իր հիմնական ժամանակն անց է կացնում ընթերցանությամբ, այդ թվում կարդալով նաև «Աստվածաշունչ», քննարկում է սոցիալ-քաղաքական թեմաներ բանտարկյալների հետ և զրուցում մշտական արժեքների, գրականության, կինոյի, միասեռականության և Աստծո մասին:

Լրագրողի այն հարցին, թե պատրաստվում է արդյոք նա լքել Ռուսաստանը ազատության մեջ հայտնվելուց հետո, Տոլոկոննիկովան պատասխանել է՝ ոչ. նա չի դիտարկում արտագաղթը որպես միջոց, քանի որ սերտ կապերով կապված է ռուսական մշակույթի հետ: Նա, սակայն, չի բացառում շարունակել կրթությունն արտասահմանում: Տոլոկոննիկովան նշել է, որ հնարավոր է, հիմնի իր սեփական կուսակցությունն այն բանից հետո, երբ ստանա համապատասխան կրթություն:

Իր հարցազրույցում, ինչպես և դատարանի դահլիճում, Տոլոկոննիկովան նշել է, որ չէր ցանկանում իր պանկ աղոթքի արարքով վիրավորել հավատացյալների զգացմունքները: Նրա կարծիքով՝ այդ ակցիան ներկայացվել է որպես աստվածապղծություն պետության կողմից վերահսկվող ԶԼՄ-ների կողմից, որոնք թաքցնում են դրա քաղաքական կողմը, այնինչ այդ արարքն ուղղված էր ռուսական պետական ապարատի և ռուսական ուղղափառ եկեղեցու հարաճման քննադատությանը:

Գերմանացի լրագրողներն իրենց հարցերը Տոլոկոննիկովային ներկայացրել են նամակի տեսքով՝ փաստաբանների միջոցով: Նա դրանց գրավոր պատասխան է տվել, որը, սակայն, առաջին անգամ առգրավվել է բանտի հսկիչների կողմից: Եվ միայն երկրորդ անգամ փաստաբաններին հաջողվել է աննկատ դուրս բերել Տոլոկոննիկովայի պատասխանները: