Ամերիկացի բլոգերն անցյալ դարի դասական մեքենաներով պահեստներ է հայտնաբերել (տեսանյութ)
ՏեսանյութերYouTube-յան բլոգեր Mr. Goodpliers-ը հրապարակել է հայտնաբերված պահեստների երկու տեսանյութ, որոնցում պահվել են անցյալ դարի մեքենաներ, այդ թվում՝ շատ հազվագյուտ նմուշներ: Բլոգերը շրջել է 13 պահեստներով և ցուցադրել իր գտածոները՝ 20-30-ականների դասական մեքենաներ, բեռնատարներ և տրակտորներ, ինչպես նաև 50-60-ականների ավելի նոր մոդելներ: Դրանց թվում կան մեքենաներ, որոնք արտադրվել են 80-ականներին։ Հավաքածուի մեծ մասը գտնվում է անմխիթար վիճակում և ծածկված է փոշու շերտով. սա վկայում է այն մասին, որ մեքենաները տասնամյակներ շարունակ չեն տեսել ցերեկային լույս:
AutoEvolution պարբերականը ուշադրություն է հրավիրել ամենաուշագրավ օրինակների վրա: Դրանց թվում է Star Four-ը՝ անցյալ դարի առաջին կեսի հազվագյուտ մեքենաներից մեկը։ Մոդելը արտադրվել է Durant Motors-ի կողմից, որը հիմնել է ամերիկացի ձեռնարկատեր Ուիլյամ «Բիլլի» Դյուրանտը: Star Four-ը ստեղծվել է որպես Ford Model T-ի պատասխան և արտադրվել է տարբեր տարբերակներով 1922-ից 1928 թվականներին: Տեսագրվել է նաև Frazer Vagabond-ը, որն առաջին անգամ ներկայացվել է 1949 թվականին:
Այնուամենայնիվ, այդ պահեստներում ոչ միայն մեքենաներ էին պահվում. մի քանի կադրերում կարելի է տեսնել ինքնաթիռի մնացորդներ և նույնիսկ Երկրորդ համաշխարհային պատերազմի ժամանակվա տորպեդոյի մնացորդներ: Այս հավաքածուի որոշ իրեր կարող են վաճառվել աճուրդում վաղ աշնանը, սակայն դեռ պարզ չէ, թե կոնկրետ ինչն է հայտնվելու մուրճի տակ։