Ինչո՞ւ են իշխանությունները կրկին «հիշել» Հովիկ Աբրահամյանին. ուշագրավ զարգացումներ

Երեկ հայտնի դարձավ, որ ՀՀ նախկին վարչապետ Հովիկ Աբրահամյանը հրավիրվել է ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն: Ուշագրավ է, որ այս հրավերը Հայաստանի նախկին վարչապետը ստանում է իր առանձնատան վաճառքից ֆոնին առաջացած աղմուկից ամիսներ անց: Հիշեցնենք, որ Հակակոռուպցիոն կոմիտեն ու Գլխավոր դատախազությունը պարզաբանումներ ու մեղադրանքներ են ներկայացրել միմյանց նախկին վարչապետ Հովիկ Աբրահամյանի Մոնումենտում կառուցած շքեղ առանձնատան վաճառքի վերաբերյալ: ՀԿ պարզաբանումը` Երևան առաջին ատյանի դատարանի որոշումը կատարելու վերաբերյալ, հակասում է իր իսկ վարույթում գտնվող բազմաթիվ այլ գործերով ՀԿ դրսևորված իրավական դիրքորոշմանը, հայտարարել էր Գլխավոր դատախազությունը:

Իսկ ահա ՊՎԾ պետ Ռոմանոս Պետրոսյանը հայտարարել էր, որ Հովիկ Աբրահամյանի առանձնատան վաճառքի մեջ որևէ հակաօրինական քայլ չի տեսնում: Երեկ էլ մամուլը գրել էր, որ ՊՎԾ-ն պատրաստվում է ուսումնասիրություններ սկսել ձկնաբուծարաններում: Բնավ էլ գաղտնիք չէ, որ, մասնավորապես, Արարատի մարզի ձկնաբուծարանների մեծ մասը պատկանում է նախկին վարչապետի ընտանիքին: Հովիկ Աբրահամյանի եղբորը՝ Հենրիկ Աբրահամյանին է պատկանում «Մխչյան ֆիշ» ընկերությունը։ Ընկերությունը ձկնաբուծարաններ ուներ Զորակ և Մխչյան համայնքներում, նաև արտահանող է։ Իրավաբանական անձանց էլեկտրոնային ռեգիստրից տեղեկանում ենք, որ ընկերությունը սնանկության գործընթաց է սկսել։ Հենրիկ Աբրահամյանն իր դստեր՝ Մերի Աբրահամյանի անունով հիմնել էր մեկ այլ ձկնաբուծարան՝ «Մերի ֆիշը»։

Այժմ հարց է առաջանում՝ Ռոմանոս Պետրոսյանը կխնայի՞ այս անգամ էլ Հովիկ Աբրահամյանին և արդյո՞ք չի նկատի խախտումները վերջինիս պատկանող ձկնաբուծարաններում, եթե այդպիսիք, իհարկե, լինեն: Թե այս սպասվող լայնածաված ստուգումները թելադրված են շատ ավելի վերևներից: Մամուլը գրել էր, որ դեկտեմբերյան ՏԻՄ ընտրությունների ժամանակ Հովիկ Աբրահամյանը օգնել է ՔՊ-ին ձայներ հավաքել Արարատի մարզում: Դրանից հետո վերջինիս եղբայրը համաներմամբ ազատ է արձակվում, իսկ վերը նշված առանձնատունը կասկածելի պայմաններում վաճառվում է: Այժմ տպավորություն է, որ դատախազություն հրավերը և ՊՎԾ ստուգումները պարզապես զուգադիպություն չեն և Աբրահամյանը կրկին հայտնվել է իշխանությունների թիրախում: Մնում է հասկանալ՝ որն է նպատակը: Հաշվի առնելով, այս իշխանությունների գործելաոճը, կամ եկել է Հովիկ Աբրահամյանի մուծվելու ժամանակը, կամ դիցուք Վեդիում սպասվող ՏԻՄ ընտրություններում իշխանությունները կրկին ցանկանում են ապավինել վերջինիս ռեսուրսներին և այսպիսով մեսիջ են հղում, որ համագործակցելը այլընտրանք չունի: