ԱՄՆ-ում անհայտ անձը առևանգել է ինքնաթիռ և սպառնում է հարվածել սուպերմարկետին (տեսանյութ)

ԱՄՆ Միսիսիպի նահանգի Տուպելո քաղաքում սպառնում է առևանգված ինքնաթիռով հարվածել Walmart սուպերմարկետին։

Ինչպես հայտնում են տեղական լրատվամիջոցները, մասնավորապես՝ The Daily Beast-ը, անհայտ անձը զանգահարել է 911 և հայտնել ինքնաթիռի առևանգման մասին։ Նա նշել է, որ մտադիր է ինքնաթիռն ուղղել դեպի հայտնի սուպերմարկետ։

Ոստիկանությունը շրջափակել է խանութի տարածքը, բոլոր մարդիկ տարհանվել են։ Տեղի բնակիչներին խնդրում են չմոտենալ սուպերմարկետին։ Դեպքի վայր են ժամանել շտապօգնության ծառայությունները։

FlightRadar ծառայությունը ցույց է տալիս, որ օդանավն այժմ քաոսային կերպով պտտվում է բնակելի թաղամասերի վրայով։ Նրա շարժմանը հետևում են տասնյակ հազարավոր օգտատերեր։ Նշվում է, որ խոսքը փոքրիկ Beech C90A King Air տուրբոպրոպ ինքնաթիռի մասին է։

Նախնական տեղեկություններով՝ ինքնաթիռը առևանգվել է Տուպելոյի տարածաշրջանային օդանավակայանից, որտեղ կասկածյալը ենթադրաբար աշխատում է։