The Independent. Թուրքիան վտանգավոր ուղով է ընթանում

Independent-ը խմբագրական հոդվածում նշում է, որ Թուրքիայի համար ռիսկի դիմելու ժամանակը չէ:

Պարբերականը հիշեցնում է, որ Անկարան փակել է իր օդային տարածքը սիրիական ուղևորական ինքնաթիռների համար այն բանից հետո, երբ շաբաթ օրը սիրիական կառավարությունն արգելք մտցրեց թուրքական օդանավերի թռիչքների նկատմամբ:

Անցյալ շաբաթ Թուրքիայի ռազմաօդային ուժերը հարկադրեցին սիրիական քաղաքացիական օդանավին վայրէջք կատարել Անկարայում: Ըստ պարբերականի՝ դա ոչ միայն ավելացնում է տարածաշրջանում տիրող լարվածությունը, այլև գործնականում փակում է հյուսիսից և արևմուտքից դեպի Սիրիա օդային միջանցքները:

Մինչ վերջերս Թուրքիան զուսպ էր արձագանքում իր սահմանների մոտ զարգացող ճգնաժամին: Թուրքիան ապաստան տրամադրեց 80 հազար սիրիական փախստականների՝ չնայած դրա հետ կապված բարդություններին: Սակայն Սիրիայի կողմից մերձսահմանային շրջանի հրետանային գնդակոծումից հետո, ինչի հետևանքով հինգ մարդ զոհվեց, Թուրքիան ողջ գիշեր գնդակոծեց սիրիական դիրքերը, իսկ խորհրդարանը ընդունեց բանաձև, որը թույլ էր տալիս զորքեր ուղարկել սահմաններից դուրս: Թուրքիան այլ ռազմական միջոցներ չձեռնարկեց և չդիմեց ՆԱՏՕ-ի իր դաշնակիցներին:

Թուրքիայի հենց այս զուսպ արձագանքի պատճառով է ինքնաթիռին վայրէջք կատարել ստիպելը տարօրինակ թվում:

Սիրիան հերքում է, որ օդանավում զենք է եղել: Ռուսաստանը որոշակի ուշացումից հետո խոստովանեց, որ Սիրիա գնացող ինքնաթիռում հակաօդային պաշտպանության համակարգերի համար էլեկտրատեխնիկական սարքավորումներ կային:

Հարց է առաջանում, գրում է պարբերականը. Ինչո՞ւ է Ռուսաստանը Սիրիային զենք մատակարարում, նույնիսկ եթե դա օրինական է: Եվ ինչո՞ւ Թուրքիան ոչ մի ապացույց չներկայացրեց, որ օդանավում զենք կար:

Անկարան մեծ ռիսկի էր դիմում՝ ստիպելով ինքնաթիռին հարկադիր վայրէջք կատարել: Օդանավում զենք չլինելու փաստը կասկածի տակ է դնում Թուրքիայի կառավարության կողմից որոշումների ընդունման գործընթացը: