«Անիմաստ աղմո՞ւկ», թե՞ «ժողովրդի թալան». ինչ էր ասում ժամանակին Փաշինյանը պետական պարտքի ավելացման մասին (տեսանյութ)

Դոլարային արտահայտությամբ Հայաստանի պետական պարտքը հատեց 10 միլիարդի շեմը։ Սակայն վարչապետ Նիկոլ Փաշինյանը դրանում որևէ արտառոց և առավել ևս մտահոգվելու առիթ չի տեսնում: 

Այլ պարագայում Նիկոլ Փաշինյանը կասեր՝ սա պատմական ռեկորդ է։ Եվ իրականում պատմական ռեկորդ է կամ հակառեկորդ. երբևէ Հայաստանն այսքան պարտք չէր ունեցել։

Նիկոլ Փաշինյանը, որը նախկինում դեմ էր պարտք վերցնելուն, եկավ ու սկսեց պետական պարտքը մեծ տեմպերով ավելացնել։ Նախկինում ասում էր՝ պարտքը վատ բան է, հիմա ասում է՝ դրանով դպրոցներ ու մանկապարտեզներ, ճանապարհներ ու շենքեր ենք կառուցում։ Կարծես նախկինում դպրոցներ ու մանկապարտեզներ, ճանապարհներ ու շենքեր չէին կառուցում։

2016 թվականի սեպտեմբերի 10-ին Նիկոլ Փաշինյանն ասել էր.

«Մեզ համար հաջորդ կարևորագույն խնդիրը Հայաստանի արտաքին պետական պարտքն է, որ, ինչպես հայտնի է՝ հատել է 5 միլիարդ դոլարի սահմանագիծը, և 2020 թվականին արտաքին պետական պարտքի սպասարկման համար Հայաստանը պետք է ծախսի 1 միլիարդ դոլար: Այսինքն՝ 1 միլիարդ դոլար պետք է ետ վճարի՝ նախկինում վերցրած պարտքերի մարման ժամանակացույցի համաձայն:

«Քաղաքացիական պայմանագիր» կուսակցությունը, ըստ այդմ, համարում է, որ Հայաստանի արտաքին պետական պարտքը պետք է աուդիտի ենթարկվի, և Հայաստանի ժողովուրդը պետք է ունենա ապացույցներ և փաստեր այն մասին, թե որքանով է այդ պարտքն արդյունավետ օգտագործվել: Ընդ որում՝ այս աուդիտի արդյունքում պարզաբանման ենթակա կարևորագույն հարցերից մեկը հետևյալն է. Ինչքանո՞վ են մսխվել միջազգային կազմակերպություններից վերցված վարկերը, և որքանո՞վ են վարկատու կազմակերպությունները վարկը տալու կամ դրանք ծախսելու ընթացքում տեղյակ եղել կոռուպցիոն ռիսկերի մասին, որքանո՞վ են ներգրավված եղել կոռուպցիոն համակարգի մեջ: Եթե վերջին հանգամանքն ապացուցող փաստեր ի հայտ գան, շատ հստակորեն Հայաստանը պետք է արտաքին պարտքի վերակառուցման հարց առաջ քաշի և բանակցի, որ միջազգային կազմակերպությունները մասնակի կամ ամբողջությամբ վերակառուցեն ՀՀ արտաքին պետական պարտքը: Բայց սա ամենը չէ. մենք պետք է ամեն ինչ անենք օֆշորային գոտիներում կուտակված հայաստանյան ծագմամբ ապօրինի փողերը հայտնաբերելու և դրանք Հայաստան վերադարձնելու համար»:

Այնուհետև Փաշինյանը հայտարարում էր, որ իշխանությունները, վարկեր վերցնելով, դրանք լափում են և փաստացի այդ վարկերը չեն ծառայում նպատակին, միայն ավելացնում են արտաքին պարտքը.

Փաշինյանը նույնիսկ հստակ հաշվարկ էր իրականացրել, թե յուրաքանչուր քաղաքացու վրա պետական պարտքը որքան է նստելու.

Ընդ որում, ոչ միայն Փաշինյանն էր մտահոգված պետական պարտքի կտրուկ ավելանալու հանգամանքից, այլ նաև վերջինիս թիմակիցները; Դիցուք՝ ներկայումս ԱԽ քարտուղարի պաշտոնը զբաղեցնող Արմեն Գրիգորյանը.

2018 թվականին, երբ Նիկոլ Փաշինյանը դարձավ վարչապետ, երբ դեռ չէր խուսափում լրագրողների հետ առերեսվելուց և նրանց ուղիղ տրված հարցերին պատասխանելուց, հրավիրել էր Կառավարության նիստերի դահլիճ ու ասել.

«Մեզ համար շատ կարևոր է, որ այնպիսի որոշում կայացնենք, որը մեզ չի ստիպի Հայաստանի արտաքին և պետական պարտքն ավելացնել»։

2021 թվականին, սակայն, Նիկոլ Փաշինյանը, ՀՀ Ազգային ժողովում իր թիմակից պատգամավորի հարցին պատասխանելիս, արդեն հերքեց ավելի քան երկու տարի հնչեցրած իսկ խոսքը՝ հայտարարելով.

«Պարտքից եկեք չվախենանք, երկրներ կան, իրենց ՀՆԱ-ի 200 % պետական պարտք ունեն»:

Այսօր էլ արդեն Փաշինյանը հայտարարում է, որ անիմաստ աղմուկ է բարձրացվում պետական պարտքի շուրջ և այն շատ թեթև պարտք է՝ պետք լինի, նոր վարկեր էլ կներգրավեն.

Հարց է առաջանում, ինչպե՞ս է ստացվում, որ ընդդիմադիր Փաշինյանի համար 6 միլիարդ դոլարի արտաքին պարտքը թալան էր, վարկերը լափելու վառ ապացույց էր և պետության կողմից վարվող սխալ տնտեսական քաղաքականության արդյունք, իսկ այժմ անգամ 10 միլիարդ դոլարի համար անիմաստ աղմուկ պետք չէ բարձրացնել և դեռ մի բան էլ այն շատ թեթև պարտք է: Ստացվում է, որ իրենց կողմից ժամանակին բարձրացված աղմուկը նույնպես անտեղի էր, զուտ պոպուլիզմ էր և քաղաքական դիվիդենտներ ստանալուն ուղղված քայլ:

լուսանկարը՝ 168.am