Պետք է պայքարենք, սա նաև մեր պայքարն է արժեքների համար. Ժան-Լուի Բուրլանժը՝ Հայաստանի խորհրդարանականներին

ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը և Հայաստան-Ֆրանսիա բարեկամական խմբի ղեկավար Վլադիմիր Վարդանյանը սեպտեմբերի 14-ին հանդիպել են Ֆրանսիայի Ազգային ժողովի արտաքին հարաբերությունների հանձնաժողովի նախագահ Ժան-Լուի Բուրլանժի գլխավորած պատվիրակության հետ: Այդ մասին հայտնում են ԱԺ-ից:

«Ֆրանսիան մեր մեծագույն բարեկամն է և Հայաստանի կողքին է բոլոր դժվարին օրերին»,- ողջունելով պատվիրակությանը ՀՀ Ազգային ժողովում՝ ասել է Սարգիս Խանդանյանը և շնորհակալություն հայտնել Ժան-Լուի Բուրլանժին հայանպաստ գործունեության համար:

«Հայաստանի արտաքին քաղաքականության օրակարգում մշտապես առանձնահատուկ կարևորություն է ունեցել Ֆրանսիայի հետ բազմակողմ հարաբերությունների զարգացումը»,- ասել է Վլադիմիր Վարդանյանը և ուրախությամբ հավելել, որ Ֆրանսիայի հետ համագործակցությունը սկսել է ընդգրկել նորանոր ոլորտներ: Նա նշել է, որ որպես բարեկամական խմբի ղեկավար՝ ինքն ամենօրյա կապի մեջ է ֆրանսիացի գործընկերների հետ՝ հստակեցնելով գործունեության երկկողմ օրակարգը:

Շնորհակալություն հայտնելով Ժան-Լուի Բուրլանժին Ֆրանսիայի խորհրդարանում հայանպաստ բանաձևերի ընդունման հարցում ակտիվ գործունեություն ծավալելու համար՝ Վլադիմիր Վարդանյանը խնդրել է շարունակել խորհրդարանական դիվանագիտական գործիքակազմի շրջանակում աջակցությունը Լաչինի միջանցքի ապաշրջափակման հարցում:

Ժան-Լուի Բուրլանժն ասել է, որ մեծ պատիվ է այս դժվարին օրերին այցելել Հայաստան: «Ներկա քաղաքական իրավիճակը թույլ է տալիս հրամայական դարձնել միջազգային գործընկերներով համախմբված լինելը և օգնել Հայաստանին դիմակայել այս բարդ ժամանակներում: Այսօր, այցելելով Ծիծեռնակաբերդի հուշահամալիր՝ Հայոց ցեղասպանության թանգարան-ինստիտուտի հուշամատյանում գրառում եմ կատարել՝ նշելով, որ բավարար չէ հիշել և աղոթել, պետք է անցնել գործողությունների»,- ասել է Ֆրանսիայի ԱԺ արտաքին հարաբերությունների հանձնաժողովի նախագահը՝ հավելելով, որ Հայաստանի հարցը խոր մտահոգություններ է առաջացրել իրենց հանձնաժողովում: Նրանք գիտակցում են, թե որքան ծայրահեղ լուրջ է իրավիճակը, և թե ինչպիսի ծանր, անմարդկային վիճակում են հայտնվել շրջափակված Լեռնային Ղարաբաղի բնակիչները:

Սարգիս Խանդանյանը ներկայացրել է Հայաստանում և Հայաստանի շուրջ ստեղծված անվտանգային իրավիճակը, ծառացած սպառնալիքներն ու մարտահրավերները, Լեռնային Ղարաբաղում ստեղծված հումանիտար ճգնաժամը:

Ժան-Լուի Բուրլանժը նշել է, որ վերադառնալուն պես կներկայացնի տիրող իրավիճակը, պահի լրջությունն ու գործելու առաջնահերթությունները՝ ընդգծելով, որ պետք է ակտիվ  աշխատանքներ իրականացնել եվրոպացի գործընկերներին այդ գործընթացներին ներգրավելու համար: Նա ընդգծել է Հայաստանում ԵՄ քաղաքացիական դիտորդական առաքելության գործունեության շարունակականության կարևորությունը: «Պետք է պայքարենք, սա նաև մեր պայքարն է արժեքների համար»,- եզրափակել է Ֆրանսիայի ԱԺ արտաքին հարաբերությունների հանձնաժողովի նախագահը: