ՀՀ պետական բյուջեի ծախսերը կազմել են շուրջ 796.8 մլրդ դրամ

2011 թվականի հունվար-նոյեմբեր ամիսների ընթացքում պետական բյուջեի ծախսերն աճել են 7.3% ով կամ 54.2 մլրդ դրամով, ինչը հիմնականում պայմանավորված է շենքերի և շինությունների, պայմանագրային այլ ծառայությունների ձեռքբերման, կենսաթոշակների, այլ ծախսերի, պետական պարտքի սպասարկման և դրամաշնորհների ծախսերի աճով:

Ընթացիկ ծախսերը հաշվետու ժամանակահատվածում կազմել են շուրջ 706.1 մլրդ դրամ` 84.4%-ով ապահովելով ծրագրի կատարումը: Նախորդ տարվա համեմատ նշված ծախսերն աճել են 6.6%-ով կամ 44 մլրդ դրամով: Ընթացիկ ծախսերից 67.7 մլրդ դրամ տրամադրվել է պետական հիմնարկների աշխատողների աշխատավարձերի վճարմանը, 4.9 մլրդ դրամ' պարտադիր սոցիալական ապահովության վճարներին, որոնք կազմել են տարեկան ծրագրի համապատասխանաբար 85.3%-ը և 80.6%-ը: Նախորդ տարվա հունվար-նոյեմբեր ամիսների համեմատ նշված ծախսերն աճել են համապատասխանաբար 8.2%-ով և 9.1%-ով: Ծառայությունների և ապրանքների ձեռքբերման նպատակով պետական բյուջեից օգտագործվել է 147.2 մլրդ դրամ, որը կազմել է տարեկան ծրագրի 83.9%-ը և 6.9% ով գերազանցել նախորդ տարվա համապատասխան ցուցանիշը: Հաշվետու ժամանակահատվածում 31 մլրդ դրամ հատկացվել է պետական պարտքի սպասարկմանը' կազմելով տարեկան ծրագրի 73.3%-ը: Մասնավորապես' նշված գումարից 20.4 մլրդ դրամը տրամադրվել է ներքին, 10.6 մլրդ դրամը` արտաքին պարտքի սպասարկմանը: Պետական պարտքի սպասարկման ծախսերը 22.9%-ով գերազանցել են նախորդ տարվա նույն ցուցանիշը, որը տեղի է ունեցել հիմնականում ներքին պետական պարտքի սպասարկման ծախսերի աճի հաշվին: Պետք է ընդգծել, որ գնաճի դեմ պայքարի շրջանակներում ֆինանսական շուկայում դիտարկվող տոկոսադրույքների ընդհանուր աճի միտումը գրեթե չի անդրադառնում պետական պարտատոմսերի եկամտաբերության վրա, քանի որ միջին և երկարաժամկետ առումներով դրամական շուկայի մասնակիցների կողմից շարունակում են դիտարկվել որպես ներդրման ամենակայուն և հուսալի միջոց:

Անցած ժամանակահատվածում ՀՀ պետական բյուջեից տրամադրվել են 16.7 մլրդ դրամի սուբսիդիաներ' կազմելով տարեկան ծրագրի 87.6%-ը և 4.3%-ով գերազանցելով նախորդ տարվա համապատասխան ցուցանիշը:

86.9 մլրդ դրամ են կազմել պետական բյուջեից տրամադրված դրամաշնորհները, որից 85.4 մլրդ դրամը տրամադրվել է պետական հատվածի այլ մակարդակներին, 1.4 մլրդ դրամը' միջազգային կազմակերպություններին և 179 մլն դրամը' օտարերկրյա կառավարություններին: Մասնավորապես' համայնքների բյուջեներին տրամադրվել են 29.7 մլրդ դրամի դոտացիաներ, որոնք պահպանվել են նախորդ տարվա մակարդակին: Դրամաշնորհների տարեկան ծրագիրն ընդհանուր առմամբ կատարվել է 91.8% ով, իսկ նախորդ տարվա համեմատ նշված ծախսերն աճել են 4.9% ով:

2011 թվականի հունվար-նոյեմբեր ամիսների ընթացքում պետական բյուջեի ծախսերի 29.2%-ն ուղղվել է սոցիալական նպաստներին և կենսաթոշակներին, որոնք կազմել են 232.7 մլրդ դրամ' ապահովելով ներկայացված բոլոր պարտավորությունների կատարումը և արձանագրելով տարեկան ծրագրի 86.8% կատարողական: Մասնավորապես' նշված գումարից 171.8 մլրդ դրամ (89.7%) են կազմել կենսաթոշակները, 60.9 մլրդ դրամ (79.8%)' նպաստները: Նախորդ տարվա նույն ժամանակահատվածի համեմատ նպաստների և կենսաթոշակների ծախսերն ավելացել են 4.7%-ով կամ 10.4 մլրդ դրամով:

Հաշվետու ժամանակահատվածում պետական բյուջեի միջոցներից 119 մլրդ դրամ տրամադրվել է այլ ծախսերին` կազմելով տարեկան ծրագրի 78.3% ը և 7.1%-ով գերազանցելով նախորդ տարվա նույն ցուցանիշը:

Պետական բյուջեի ոչ ֆինանսական ակտիվների հետ գործառնությունները հունվար-նոյեմբեր ժամանակահատվածում կազմել են 90.7 մլրդ դրամ կամ տարեկան ծրագրի 85.1% ը: Մասնավորապես' 92.1 մլրդ դրամ են կազմել ոչ ֆինանսական ակտիվների գծով ծախսերը, որոնց ծրագիրը կատարվել է 84.1%-ով: Շուրջ 1.5 մլրդ դրամ է մուտքագրվել ոչ ֆինանսական ակտիվների օտարումից' կազմելով տարեկան ծրագրի 48.6% ը: Նախորդ տարվա նույն ժամանակահատվածի համեմատ ոչ ֆինանսական ակտիվների հետ գործառնությունների ցուցանիշն աճել է 12.7%-ով' հիմնականում պայմանավորված շենքերի և շինությունների վրա կատարված ծախսերի աճով: