«Շատ հաճախ խախտումները պահանջարկից են գալիս». Բաբկեն Պիպոյան

«Մսի ստուգումներ կատարվել են Գումի շուկային հարակից տարածքում, Կոմիտասի մսի շուկայում։ Խախտումները տարաբնույթ էին. միսը վաճառում էին առանց համապատասխան փաստաթղթերի, ինչպես նաև հայտնաբերել ենք ձիու միս և սատկած կենդանու միս», – այսօր «Պոստ Սկրիպտում» մամուլի ակումբում տեղի ունեցած ասուլիսի ժամանակ հայտարարեց Գյուղատնտեսության նախարարության սննդի անվտանգության ծառայության հասարակայնության կապերի բաժնի պետ Բաբկեն Պիպոյանը։ Նա նշեց, որ հայտնաբերված խախտումների պատճառով մսավաճառները երկու միլիոն դրամ տուգանք են վճարել։

Մսի վաճառքն այսօր իրականացվում է ոչ սառնարանային պայմաններում և առանց ջերմային մշակման։

«Հիմնականում միսը վաճառվում է դրսից, և մեզ մոտ պետք է ձևավորել այդ մշակույթը, այդ հարցում մենք բոլորս ունենք մեծ աշխատանք. շատ հաճախ խախտումները պահանջարկից են գալիս։ Եթե քաղաքացին դրսից չգնի, ապա միսն այլևս դրսում չեն դնի», – ասաց Բաբկեն Պիպոյանը։ Նա նշեց, որ պետք է կարողանանք հասնել նրան, որ ՀՀ քաղաքացին չցանկանա գնել դրսում վաճառվող միսը։

Նա նշեց, որ սուպերմարկետներում հիմնականում ստուգվում է ակցիայի տակ գտնվող սննդամթերքը, հատկապես նախատոնական օրերին. «Սակայն փառք Աստծո ստուգումների ընթացքում այդտեղ խախտումներ չնկատեցինք», – ասաց նա։